Mazhoranca bëri një shtyrje të rivotimit të paketës Anti-Shpifje pas kthimit nga Presidenca, arsyetuar kjo me mendimin që duhet të vijë nga Venecia dhe për këtë rast.
“Komisioni i Venecias ka pranuar që ta shqyrtojë me procedurë të përshpejtuar në sesionin e 21 marsit. Gjatë muajit shkurt përfaqësues të Komisionit të Venecias do të vinë në Tiranë për të dialogur me ne, me këdo. Votimi i dekretit për mediat audiovizive, diskutimi për të të shtyhet, deri sa Komisioni i Venecias të na sjellë raportin e vet, më 20-21 mars”, tha nr.2 i socoialistëve, Taulant Balla.
Kjo çoi në reagimin e kreut të shtetit, sipas së cilit ka një reflektim pozitiv nga ana e mazhorancës.
“Përshëndes vendimin pozitiv dhe të përgjegjshëm të Kuvendit për t’u tërhequr nga votimi i paketës së ashtuquajtur “anti-shpifje”. Reflektimi i sotëm i shërbën një qëllimi më të madh të përbashkët që është mbrojtja e të drejtave kushtetuese të të gjithë qytetarëve shqiptarë, dhe njëkohësisht garantimit të standardeve demokratike dhe europiane”, tha Meta.
Shtyrja sakaq u përshëndet dhe nga ambasadori Soreca.
“Mirëpresim vendimin e mazhorancës për të shtyre votimin për këtë paketë. Po presim për opinionin e Venecias dhe i inkurajojmë autoritetet që t’i adresojnë shqetësimet e tyre”, shkroi ambasadorii BE-së.
Ndërsa PD e përjetoi shtyrjen si fitore të saj. “Kauza jonë e drejtë fitoi një betejë. Edi Rama nuk e kaloi ligjin që kërcënon gazetarët me burg dhe median online me mbyllje dhe gjoba. Pushteti i Edi Ramës po shkërrmoqet dita ditës. Të gjithë bashkë, ne mund t’ia dalim të ruajmë liritë tona, lirinë e shprehjes, lirinë e votës, lirinë zgjedhjes”, u shpreh ish-deputetja Vokshi. /tesheshi.com/
