Një lëvizje e furishme brenda koalicionit qeveritar pritet të ndodhë javën e ardhshme.
Burime në grupin parlamentar të mazhorancës bëjnë të ditur se sot kanë dalë zërat se një ministër i rëndësishëm i Lëvizjes Socialiste për Integrim pritet të japë dorëheqje nga qeveria “Rama”, e që do të shikohet si një presion i radhës për të bërë ndryshime të mëtejshme në kabinet.
Edhe pse ende nuk është konfimruar, në këto orë po flitet për largimin e ministrit të Drejtësisë, Ylli Manjani, pas një përplasje që kreu i LSI-së Ilir Meta ka pasur në kryeministrin Edi Rama, në lidhje me çështjen e komisionit të Vettingut.
Meta ka propozuar një formulë kompromisi në lidhje me ribërjen e komisionit që do të kalojë në sitë gjyqtarët dhe prokurorët, por që është kundërshtuar prerë nga Edi Rama.
Palët duket se ndodhen në acarim maksimal, dhe LSI ka riaktivizuar kërkesën për largimin e ministrit të Brendshëm, Saimir Tahiri.
Luan Rama, Sekretari i Përgjithshëm i LSI-së ka qenë shumë më i ashpër se Flamur Noka i PD-së, sot në mbledhjen e komisionit parlamentar të sigurisë kombëtare, ku ka kërkuar “përgjegjësi individuale” në Ministrinë e Brendshme për grabitjen e ndodhur në aeroportin e Rinasit, disa ditë më parë.
Nëse ndodh largimi i një ministri, qeveria futet në një qerdhull delikat pasi do të duhet ta dekretojë Nishani dhe të votohet në Parlament, ku dhe LSI-ja me votë mund të tregojë pakënaqësi për mosplotësimin e kërkesave të saj.
E gjitha kjo situatë vjen pas një presioni thuajse të përditshëm mediatik ndaj Edi Ramës nga qarqe pranë opozitës dhe LSI-së.
PD-ja ka depozituar një padi penale ndaj kryeministrit Edi Rama, duke e akuzuar se ka paguar 80 mijë dollar për të bërë foto me Presidentin e SHBA-së, Barack Obama. Një histori që kur të diskutohet të enjten në Kuvend pritet të përgojojë kreun e shtetit më të fuqishëm të botës, gjë që mund të kthehet në një debat shumë të rrezikshëm për të gjithë ata që e ndërmarrin, por mjaft të sikletshëm për kryeministrin.
Opozita ka hartuar një plan për të bllokuar seancën e ditës së enjte, ndërkohë që të mërkurën është dita kur Edi Rama duhet të ngjitet në katin e tretë të kryesisë së Kuvendit për të takuar Ilir Metën.
Herën e fundit ishte vetë Meta që u fut në Kryeministri.
Çdo të ndodhë pas dy ditësh brenda mazhorancës?!
Si gjithnjë, s’kemi parë gjë akoma! /tesheshi.com/
