Mazhoranca po planifikon se si Berisha, i cili drejton një prej dy gjysmave të PD-së, që për më tepër nuk kontrollon dot grupin parlamentar demokrat që njeh si kryetar Alibeajn, si “non grata” të mos flasë më, së paku në foltoren e parlamentit.
Propozimi u dha nga kreu i deputetëve të PS-së, Taulant Balla. “Është e rëndë për Kuvendin e Shqipërisë që një ‘non grata’ vazhdon ta përdhunojë Foltoren e Kuvendit sa herë i jepet mundësi. Unë mendoj që ka ardhur koha që ne të marrim një vendim, që një gjë e zezë që vjen nga bota e përtejme, që vjen bën pis Foltoren dhe kthehet në botën e përtejme të mos flasë më në Foltoren e Kuvendit”, tha Balla, pa specifikuar se si duhet të procedohet për ta mundësuar këtë.
Reagimi i Ballës erdhi pas një fjalëmbajtje të rëndë të Berishës, prej akuzave dhe fjalorit pa caqe etike, tipike e tij.
“12-a është dita e gjyqit, gjyqit popullor. Vrimë miu nuk do gjesh atë ditë, dil po deshe, do të gjejmë aty ku je, edhe zyrën do të ta tregojmë(drejtuar Ballës me këto fjalë). Nuk ka parlament si ky, nuk ka.
Qytetarë, 12 nëntori është dita juaj, dita e së vërtetë shqiptare, ju ftoj kudo që jeni, brenda dhe jashtë Shqipërusë, të përzëmë këtë bandë nga pushteti”, theksoi Berisha, duke iu referuar një proteste të thirrur më 12 nëntor. /tesheshi.com/
