Me 78 vota pro, 17 kundër dhe 8 abstenime, presidenti Meta do vijojë të mbajë kreun e shtetit. Votimi në parlament erdhi pas leximit të raportit mbi shkeljet e tij kushtetuese, ku mazhoranca, diktuar nga Venecia, vendosi që të mos e shkarkojë.
“Nuk e kisha paraparë që presidenti do të ishte aq i mirë për opozitën sa të bëhej i keq për Shqipërinë me akte vandale.
E ktheu zyrën në seli të operacioneve politike të njëanshme dhe vatër të hedhjes apo ndezjes së zjarreve duke përdorur Kushtetutën si letër dhe mllefin ndaj shumicës si benzinë, ama këtu ne, si në çdo rast, nuk mund ta anashkalojmë atë pikë të raportit të Komisionit të Venecias ku thuhet se pavarësisht të gjitha shkeljeve, d.m.th i ka bërë shkeljet dhe vënçe, nuk janë aq të rënda sa të justifikojnë shkarkimin.
Komisioni Hetimor e thotë qartë se nuk kemi një përkufizim se çfarë do të thotë ‘shkelje e rëndë’ në vetvete, për të konstatuar a është e rëndë apo jo. Por mesazhi që japim ne duke iu referuar të ardhmes dhe jo të shkuarës dhe duke e parë këtë rast si mundësi për të adresuar për të ardhmen”, argumentoi Rama.
Ai u shpreh se shumica do të iniciojë një nismë për një ligj organik për institucionin e Presidentit.
“Është koha që Kuvendi ti jap drejtim qartësimit të kompetencave formale dhe substanciale, një ligj organik për Presidentin, ku të përfshihen përcaktimet për mosbllokimin e proceseve zgjedhore…”.
“Nuk mund të ndodhë më që presidenti të refuzojë të dekretojë ministra. Të gjitha duhen adresuar, jo për Ilir Metën, por institucionin e presidentit, që sot është kapur për fyti dhe përdoret si instrument për të bërë politikë partiake, për të nxitur konflikt dhe për të ushqyer konflikt. Ne kemi një president me Hënë, sa herë Hëna rrotullohet në drejtimin e duhur dhe bashkëpunon si në rastin e COVID ne jemi në dispozicion për të bashkëpunuar”, tha i pari i qeverisë. /tesheshi.com/
