Mazhoranca i kujtoi presidenti Meta se ai nuk mund ta shpërndajë parlamentin, ashtu siç ka paralajmëruar e është përbetuar se mund ta bëjë këtë hap më 15 mars.
Eshtë Taulant Balla, kreu i grupit të PS-së dhe Sekretar i Përgjithshëm i saj, që tha se e kundërta mund dhe duhet të ndodhë. “Kuvendi i Shqipërisë e shkarkon Presidentin, Presidenti i vjen anash Kuvendit.
Presidenti duhet ta kuptojë se është nën hetim për shkeljet kushtetuese.
Deklarata se presidenti do të shpërndajë Kuvendin është qesharake.
Kushtetuta dhe rregullorja i kanë të përcaktuara rastet kur presidenti mund t’i drejtohet Kuvendit”, arsyetoi Balla.
Ai shtoi se të enjten Kuvendi do të shqyrtojë dekretin e Metës për betimet në Kushtetutese të firmosur në tubimin e 2 marsit.
“Unë nuk përgjigjem me emocione. Unë përgjigjem me respekt dhe drejtësi sa i përket Kushtetutës. E garantoj presidentit që do ta shqyrtojmë dekretin. Besoj që bashkëndajmë të gjithë vlerësimin që Shameti (Adnor) është një prej profesorëve të drejtësisë në vend. Shameti është iniciues i këtij ligji. Shameti është deputet i Skraparit dhe shpresoj që urrejtja e Metës të mos lidhet me të”, tha Balla. /tesheshi.com/
”
