Fakulteti i Drejtësisë vijon të mbetet ndër degët e preferuara për maturantët edhe këtë vit. Vendin e parë në kërkesat e depozituara e zë dega administrim biznes, te Fakultetit Ekonomik.
Sipas Qendrës së Shërbimeve Arsimore, këtë vit kanë aplikuar mbi 6000 maturantë në Fakultetin e Drejtësisë.
“Vendin e parë e mban Administrimi i Biznesit, që shoqërohet më pas me Fakultetin e Drejtësisë. Më tej vijon Psikologjia, e kështu me radhë”, thotë Rezana Vrapi, drejtoreshë e Agjencisë Kombëtare të Provimeve, raporton TCH.
Shkencat e Telekomunikacionit janë gjithashtu degë të preferuara nga maturantët, ndërsa dega më e vështirë është ajo e mjekësisë.
“Një nga degët që na rezulton si më e vështira, por shumë e kërkuar nga ana e maturantëve, është padiskutim mjekësia e përgjithshme, që shoqërohet më pas nga farmacia apo stomatologjia. Kjo për faktin se Universiteti i Mjekësisë në Tiranë ka vendosur një notë mesatare mbi 8.5, gjë që nuk lejon maturantët nën këtë mesatare që të aplikojnë.
Vetëm maturantët me mesatare shumë të lartë mund ta kapin këtë lloj dege. Edhe nëse ka maturantë me mesatare 8.5 apo 8.6 që aplikojnë, gjasat për ta fituar atë janë të kufizuara, për shkak se këtu konkurojnë nga e gjithë Shqipëria”, sqaron Vrapi.
Ndërsa si universitete, më i preferuari nisur nga aplikimet e maturantëve, në vend të parë është ai i Tiranës, e më pas vjen Mjekësia dhe Politeknikumi. /tesheshi.com/
