Media serbe ka potencuar faktin se “Shengeni ballkanik” ka mbështetje të fortë amerikane.
“Mini-Shengeni” është një iniciativë premtuese dhe ka mbështetjen tonë”, deklaroi së fundi Matthew Palmer, cituar nga B92.
“Perspektiva Evropiane e Ballkanit Perëndimor, e cila ka qenë baza e angazhimit të SHBA në rajon për më shumë se 20 vjet, nuk ka ndryshuar dhe nuk do të ndryshojë”, Matthew Palmer, Zëvendës Ndihmës Sekretari i Shtetit i SHBA dhe Përfaqësuesi Special i SHBA për Ballkani Perëndimor.
“Kjo është pikërisht arsyeja që dështimi i Këshillit Evropian për të arritur konsensus për hapjen e negociatave me Maqedoninë e Veriut dhe Shqipërinë ka qenë kaq thellësisht zhgënjyese. Ne shpresojmë që Këshilli Evropian të jetë në gjendje të rishikojë qëndrimin e tij dhe të bëjë përparim në takimin e liderëve në Zagreb, të arrihet konsensusi i nevojshëm dhe të fillojë ky proces të rëndësishëm, duke dërguar një sinjal të rëndësishëm për rajonin”, tha Palmer.
“Ndërkohë, ndërsa SHBA marrin një rol më të madh në Ballkanin Perëndimor dhe BE është në rrezik të perceptohet në rajon si tërheqje, vetë rajoni po merr përsipër iniciativën. Angazhimi i Serbisë, Shqipërisë dhe Maqedonisë së Veriut për të përmirësuar bashkëpunim përmes një iniciative të quajtur ‘Mini Shengen’ tregon se udhëheqësit në rajon po marrin përgjegjësinë për fatin e tyre, duke kontrolluar të ardhmen e tyre”, vuri në dukje zyrtari i lartë amerikan.
Sipas tij, struktura e kësaj iniciative është e hapur, ka vend për Malin e Zi, Bosnje-Hercegovinën dhe Kosovën.
“Eshtë një iniciativë premtuese dhe ajo ka mbështetjen tonë dhe ne jemi të përkushtuar që të punojmë në partneritet me krerët e Ballkanit Perëndimor për të përparuar”, përfundoi Palmer. /tesheshi.com/
