I dërguari special i SHBA për Ballkanin Perëndimor, Matthew Palmer, tha se SHBA mbështet të drejtën e Greqisë për të siguruar kufirin tokësor me Turqinë dhe paralajmëroi për efektet destabilizuese të “refugjatëve të mashtruar” që përpiqen të hyjnë në Bashkimin Evropian.
“SHBA konsideron se situata aktuale është e paqëndrueshme, e papranueshme,” tha ai gjatë një vizite në qytetin grek të Aleksandroupolisit, raportoi gazeta greke Kathimerini.
Ai vlerësoi se lëvizja e pakontrolluar e mijëra njerëzve, të cilët janë mashtruar të besojnë se rruga për në Evropë është e hapur, është “në thelb destabilizuese dhe e paqëndrueshme”.
“Kjo duhet të ndryshojë,” tha Palmer, i cili është gjithashtu ndihmës sekretari i shtetit për Evropën dhe Euroazinë.
Ai shprehu besim se marrëveshja e arritur kohët e fundit midis Rusisë dhe Turqisë për armëpushimin në Idlib do të zvogëlonte tensionet.
I pyetur nëse Greqia duhet të fuste masa shtesë sigurie në kufirin e saj, Palmer tha se SHBA mbështesin të drejtën e Greqisë për të mbrojtur kufijtë e saj.
Ai theksoi se ishte i impresionuar nga profesionalizmi i shfaqur nga shërbimet greke të sigurisë përgjatë kufirit me Turqinë. /tesheshi.com/
