Redaksia e tesheshi.com detyrohet të denoncojë një tjetër vjedhje të radhës, që media të ndryshme online, ndër to të vetëkonsideruara si elitare, i bëjnë shkrimeve të saj ekskluzive.
Një ditë më parë, tesheshi.com publikoi rastin e një shtetasi serb që i dërgonte mesazh mikut të tij shqiptar, mbi impresionet gjatë një vizite në Shkodër, reflektuar në dialog më të birin.
Më pas, shkrimi merret nga Panorama në versionin online duke bërë ndërhyrje në titull por jo në tekst, dhe duke ia hequr fare referencën autoriale në fund.
Dhe kjo pra ndodh me një media jo aq të rëndomtë, që gjithsesi ka një emër në treg dhe që përfaqson tashmë një traditë disavjeçare. Por online-ni më shumë sesa një sprovë profesionale, po shfaqet si një sprovë morale në profesion duke jua hequr cipën.
Ditë më parë ishte Top Channel që vodhi nga tesheshi.com intervistën ekskluzive të Joe Dioguardit duke ia hequr referencën ngjashëm si në rastin e Panoramës, e servirur si të sajën.
Do ishte e falshme gjithsesi, nëse zhvatje të tilla të pronës ditën për diell do bëheshin nga portale ordinere, të hapura me shumicë, që mbahen vetëm me mallin e tjetrit të vjedhur kaçakshe; por është e pafalshme kur kjo ndodh nga media me emër, që për pako gjë, për ca klikime më shumë, e ndyjnë veten dhe emrin që kanë.
Kujtojmë që kohë më parë, ishte Panorama ajo që denonconte lapsi.al për vjedhje materialesh të saj.
Sigurisht që nuk është vetëm Panorama hajdutja e vetme, “maska” e vetme që të zhvat. Ajo pasohet dhe nga të tjera, kun ë Kosovë veçohet Ekspresi i famshëm, jo për profesionalizëm por për paçavure, që ta zgrap pa asnjë vraje ndërgjegje mundin. Vraje ndërgjegje? Duhet të jetë diçka që ndoshta e dëgjojnë për herë të parë. As që e njohin si nocion moral.
Dhe derisa të nis të veprojë ligji, tesheshi.com është i detyruar t’u bëjë denoncim publik këtyrë “maskave pa maskë” në gazetarinë online. /tesheshi.com/
