Në një analizë të gjerë të publikuar nga Associated Press, zbulohet se mashtruesit kanë vjedhur më shumë se 280 miliardë dollarë ndihmë financiare për qytetarët në pandeminë COVID-19.
123 miliardë dollarë të tjerë u shpërdoruan ose u shpenzuan keq.
Humbja totale përfaqëson dhjetë për qind të 4.2 trilion dollarëve që qeveria amerikane ka paguar deri më tani për ndihmën për pandeminë. Ky numër me siguri do të rritet ndërsa hetuesit gërmojnë më thellë në mijëra rastet e mundshme të abuzimit.
Pjesa më e madhe e përvetësimit ishte e pacipë, madje e thjeshtë. Mashtruesit përdorën numrat e Sigurimeve Shoqërore të njerëzve të vdekur dhe të burgosurve federalë për të marrë përfitimet e papunësisë. Mashtruesit mblodhën ato përfitime në shumë shtete dhe aplikantët për ndihmë federale nuk u kontrolluan me bazën e të dhënave të Departamentit të Thesarit.
E gjithë kjo çoi në mashtrimin më të madh në historinë e SHBA. Hajdutët grabitën miliarda dollarë në ndihmë federale për të luftuar pasojat ekonomike të pandemisë më të keqe në 100 vjet dhe për të stabilizuar një ekonomi që ishte në rënie të lirë.
Si mund të vidheshin kaq shumë para? Hetuesit dhe ekspertët e jashtëm thonë se qeveria amerikane, në një përpjekje për të shpenzuar shpejt triliona dollarë në ndihmë humanitare, bëri shumë pak mbikëqyrje gjatë fazave të hershme të pandemisë dhe vendosi shumë pak kufizime për aplikantët. Me pak fjalë, thonë ata, mashtrimi ishte shumë i lehtë.
“Ishte një grumbull i pafund parash që çdokush mund të kishte akses. Njerëzit u mashtruan duke menduar se ishte një gjë e pranueshme shoqërore për t’u bërë, edhe pse nuk ishte e ligjshme,” tha Dan Fruchter, kreu i divizionit të mashtrimit dhe krimit për SHBA. Ndaj, zyra e Prokurorit në Distriktin Lindor të Uashingtonit ka paditur më shumë se 2230 të dyshuar për mashtrime të lidhura me pandeminë dhe po kryen mijëra hetime.
Shumica e parave të grabitura u vodhën nga tre iniciativa të mëdha të ndihmës pandemike të nisura gjatë administratës Trump dhe të pasuara nga ajo e Joe Biden.
Këto programe ishin krijuar për ndihmë ndaj bizneseve të vogla dhe që të papunët t’i mbijetonin rënies ekonomike të shkaktuar nga pandemia.
Të gjitha këto vjedhje, të mëdha dhe të vogla, ilustrojnë një epidemi mashtrimi dhe transaksionesh të dyshimta në një kohë kur Amerika po luftonte me spitale të mbipopulluara, mbyllje shkollash dhe po ashtu biznese të mbyllura.
Michael Horowitz, inspektori i përgjithshëm i Departamentit të Drejtësisë së SHBA-së, i cili kryeson Komitetin Federal të Reagimit ndaj Pandemisë, i tha Kongresit se “është qartazi dhjetëra miliarda dollarë” dhe se mashtrimi mund të kalojë përfundimisht 100 miliardë dollarë.
Horowitz i tha AP se ai i qëndron këtij vlerësimi, por nuk është i sigurt për një shifër më të saktë derisa të ketë të dhëna më konkrete.
“Unë hezitoj të shkoj shumë larg në vlerësim, por është e qartë se është një shumë e madhe dhe se shifra përfundimtare do të marrë vite,” tha ai.
Para se të largohej nga detyra, ish-presidenti amerikan Donald Trump miratoi masat e ndihmës urgjente në shumën totale prej 3.2 trilion dollarë. Plani i Biden për të shpëtuar Amerikën për vitin 2021 miratoi shpenzimin e një shtesë prej 1.9 trilion dollarësh.
Rreth një e pesta e 5.2 trilion dollarëve (9.4 trilionë dollarë) duhet ende të disbursohet.
Asnjëherë më parë nuk është injektuar kaq shpejt në ekonominë amerikane kaq shumë ndihmë emergjente federale. /tesheshi.com/
