Komiteti Teknik COVID vendosi të mos ndryshojë asgjë nga masat aktuale, duke pretenduar se ato po japin efekt
“Nga prezantimi i shifrave ka një tendencë uljeje dhe është deri diku e qëndrueshme. Komiteti mendon se këto shifra janë si rezultat i masave të propozuar nga komiteti disa javë më parë dhe respektimi i masave nga popullata, pasi ka një përmirësim të lehtë të zbatimit të tyre, por jo në nivelet që duhet.
Në Europë disa vende po hyjnë në atë që quhet vala e tretë. Pavarësisht uljes së indikatorëve situata ende mbetet delikate. Për këtë arsye komiteti ka vendosur që masat të mos ndryshojnë”, theksoi zv. ministrja e Shëndetësisë Mira Rakacolli.
Nga ana tjetër, drejtoresha e ISHP-së Albana Fico, tha se shifrat nuk janë në ato nivele për të lehtësuar masat dhe se COVID-I ka rezultuar më fatal te meshkujt.
“Më shumë fatal COVID te meshkujt, numri mesatar i të shtruarve në spital ka rënë në 394 nga 466, edhe pse kemi vazhduar me vaksinimin duhet ta kemi të qartë që indikatorët nuk janë ulur në një mënyrë drastike për të marrë masa të një karakteri tjetër.
Edhe harta e Europës tregon për një rritje të numrave, prandaj doja të apeloja për qytetarët që të mbajnë maskën, distancimin, respektimi i rregullave dhe masave të ndërmarra”, tha Fico. /tesheshi.com/
