Policia e Shtetit shpalosi masat e sigurisë për Samitin e të martës, atë BE-Ballkan Perëndimor, ku qartazi nuk ka vend për protestën e thirrur nga Berisha. Kjo pasi aty ku do Berisha, para Kryeministrisë, bulevardi kryesor, nga Ura e Lanës te Universiteti, do jetë e bllokuar, pasi do përfshihet në perimetrin e sigurisë, gjë që tregohet dhe nga harta.
Me ngjyrë kafe, tregohet e gjithë lëvizja e delegacioneve, si dhe zonat nën perimetër sigurie.
Megjithatë, edhe pse i është ofruar Sheshi Skënderbej, Berisha këmbëngul për te Kryeministria, nën thirrjen “Bulevardin s’e lëshojmë”.
Në deklaratën e Policisë së Shtetit për këtë rast, thuhet se “përmes sjelljes dhe qëndrimeve tona institucionale dhe qytetare, gjatë procesit të zhvillimit të këtij Samiti, ne kemi shansin që të dëshmojmë vlerat tona historike, si mikëpritja, mirëkuptimi dhe maturia, si dhe prespektivën europiane që kemi treguar ndër shekuj, dhe të cilën kemi rastin ta shpalosim më 6 dhjetor, gjatë zhvillimit të Samitit të Bashkimit Europian, në Tiranë”. /tesheshi.com/
