Rusia është nën shock nga masakra e së dielës në qendrën e koncerteve Crocus City Hall në Moskë. Ajo ndodhi një orë para se të dilte në skenë emri i madh i natës, grupi rock Piknik. Por ishte dhe ky grup shënjestër e sulmit?
“Lani fytyrën me gjakun tuaj”
“Mos kini frikë nga asgjë, asnjë flakë, asnjë hije. Ti nuk je më një djalë i vogël rozë. Lani fytyrën çdo mëngjes me gjakun tuaj”. Kështu përkthehen disa tekste nga hiti më i fundit i Piknik, i ngarkuar në YouTube më 7 mars.
Piknik konsiderohen nga veteranët e skenës së rock-ut rus. Ata u shfaqën për herë të parë në vitin 1978 në Shën Petersburg, i quajtur atëherë Leningrad, si “Orion”. Në vitin 1981 u quajtën “Piknik”. Ishte një taktikë e zakonshme për grupet e rock-ut të epokës sovjetike që të zgjidhnin emra që të kujtonin Perëndimin, por që nuk mund të ndaloheshin lehtë.
Në vitet ’80, Piknik mezi gjente salla të mëdha për koncertet e tyre. Ata filluan të luanin në skena më të vogla rock, ndonjëherë në skajet e skenës së artit. Ata i qëndruan besnikë idhujve të tyre të përjetshëm, si Rolling Stones, Led Zeppelin dhe emrat e mëdhenj të muzikës progresive rock. Drejtues i grupit që nga viti 1982 është këngëtari dhe kompozitori Edmund Skliarski, djali i një shkencëtari të shquar dhe një pianisti. Ai i kushton shumë rëndësi origjinës së tij polake dhe besimit të tij katolik. Burimet e frymëzimit për Skliarskin nuk janë vetëm Rolling Stones, por edhe poezia ruse e fillimit të shekullit të 20-të.
A janë Piknik pro luftës?
Në maj 2023, grupi u vlerësua nga shkrimtari nacionalist rus Zakhar Prilepin për qëndrimin e tij ndaj çështjes së Ukrainës. Në veçanti, Prilepin tha se Skliarski mbështeti në mënyrë aktive “operacionin special” në Ukrainë, duke përfshirë edhe donacionet, që sipas tij janë “një kusht normal për çdo njeri, për çdo muzikant në Rusi”. Grupi nuk i mohoi këto pretendime.
Një paraqitje në sallën madhështore Crocus mund të interpretohet si një shenjë e besnikërisë ndaj lidershipit politik. Në të njëjtën kohë, emra të tjerë të mëdhenj të skenës ruse të rock-ut – si Boris Grebeshnikov i grupit Aquarium, Yuri Shevchuk i DDT dhe Zemfira – u detyruan të iknin jashtë vendit, duke ndërprerë karrierën e tyre të suksesshme. “Mbretëresha e popit rus” e vetë-mërguar, Alla Pugatsova, kritikon gjithashtu regjimin e Vladimir Putin.
Para se të fillonte pushtimi rus, Piknik ishte futur në listën e “artistëve të padëshiruar” në Ukrainë, pasi ata kishin mbajtur disa koncerte në gadishullin e Krimesë të pushtuar nga Rusia.
Crocus City Hall, vend impozant i koncerteve
Çdo spekulim nëse sulmuesit kishin shënjestruar Piknik mbetet i pasigurt. Sidoqoftë, Crocus City Hall tashmë është vendosur si një nga vendet më të rëndësishme të koncerteve në Rusi. Është vetëm 20 km nga Kremlini dhe ndodhet pranë periferive të privilegjuara perëndimore të Moskës, ku masat e sigurisë janë disi më të relaksuara se qendra e kryeqytetit rus. Ndoshta e gjithë kjo luajti një rol për autorët e sulmit.
Minute of silence #Moscou #MoscowAttack #Crocus_City_Hall #Moskau #Russia
#CrocusAttack pic.twitter.com/C8UwCQuDYl— 𝑮𝒖𝒓𝒑𝒓𝒆𝒆𝒕 𝑺𝒊𝒏𝒈𝒉 𝑴𝒂𝒂𝒏 (@iamgurpreetmaan) March 25, 2024
Ndërtesa i përket grupit të biznesit të oligarkut Araz Agalarov, i cili është pjesërisht nga Azerbajxhani dhe është një lojtar kryesor në tregun rus të pasurive të paluajtshme. Në skenën e saj kanë luajtur emra të mëdhenj të muzikës pop dhe rock të huaj, si Scorpions, Nazareth, Sting, Elton John, Pet Shop Boys e të tjerë. Në vitin 2013, Donald Trump ishte gjithashtu në Crocus City Hall si një “i ftuar special” për konkursin e bukurisë Miss Universe. Megjithatë, ato ditë ekstroversioni kanë mbaruar…/tesheshi.com/
