Presidenti Donald Trump kritikon FBI-në në një postimnë Tuiter, pasi sipas tij, nuk ka identifikuar sinjalet paralajmëruesepërpara masakrës në një shkollë të mesme të Floridës.
Por, kritikat e Trump vijnë edhe me ironinë se agjencia “po shpenzonte shumë kohë duke u munduar të vërtetojë ndërhyrjen ruse” në fushatën e tij.
“Nuk ka asnjë ndërhyrje. Merruni me gjërat thelbësore dhe na bëni krenarë”, shtoi presidenti amerikan në postimin e tij në median sociale.
Edhe zyrtarë të tjerë kanë reaguar në lidhje me pafuqinë e autoriteteve për të parandaluar sulmet në shkolla.
Guvernatori i Floridas, Rick Scott tha se kreu i Byrosë Federale të hetimeve duhet të japë dorëheqjen, ndërsa prokurori i Përgjithshëm, Jeff Sessions urdhëroi një rishqyrtim, duke kritikuar dështimet e FBI-së.
Edhe disa prej të afërmve të 17 personave të vrarë të mërkurën në shkollën e mesme Marjory Stoneman Douglas në Parkland, ngritën zërin ndaj mosveprimit të agjencisë kryesore federale të zbatimit të ligjit.
Në 5 janar, një person i afërt me të dyshuarin, kontaktoi Byronë Federale për të denoncuar sjelljen e rrezikshme të ish-studentit, dëshirën e tij për të vrarë njerëz, postimet shqetësuese në rrjetet sociale dhe faktin se ai zotëronte një armë. /tesheshi.com/
