Pas një takimi të gjatë në kryeqytetin e vendit me zyrtarët e lartë të sigurisë, kryeministri i Turqisë ka lajmëruar përgatitjen e një plani veprimi kundër terrorit. Ahmet Davutogllu ka njoftuar se në zbatim do të vihen masa të reja sigurie, duke marrë shkas nga ajo që ngjau ditë më parë, kur dhjetëra njerëz humbën jetën e u plagosën nga një shpërthim.
“Do të bëjmë ndryshime në çështjen e sigurisë,” u tha gazetarëve kryeministri në një konferencë shtypi. Prania e forcave të sigurisë do të jetë këtej e tutje më e madhe dhe më e dukshme në vend, si pjesë e një plani të ri, por Davutogllu nuk dha hollësi të mëtejshme. Veçse ai kërkoi dhe mbështetjen e qytetarëve për planin e ri të sigurisë.
“Grupet terroriste kërkojnë të shkaktojnë tronditje dhe kaos te popullata. Ne të tërë duhet t’i ndihmojmë forcat e sigurisë,” ka thënë shefi i qeverisë turke.
Gjithashtu ai pohoi edhe një herë se është e pakundërshtueshme lidhja e PKK-së dhe PYD-së e YPG-së me ideuesit e kryerësit e shpërthimit në Ankara. /tesheshi.com/
