Dhoma e Përfaqësuesve e Kongresit Amerikan ka miratuar me shumicë dërrmuese një projektligj që parashikon një kontroll më të rreptë të të gjithë atyre që do të duan të udhëtojnë për në Shtetet e Bashkuara të Amerikës.
Projektligji i miratuar fokusohet te programi “Visa Waiver”, që u mundëson qytetarëve të 38 shteteve të udhëtojnë e të qëndrojnë në SHBA për 90 ditë pa u pajisur me vizë.
Sipas projektligjit të miratuar, do të ketë një sërë ndryshimesh, përfshirë kërkimin e vizave të reja për qytetarët e çdo vendi që çmohet si vatër terrori. E njëjta procedurë do të ndiqet dhe për ata persona që kanë udhëtuar drejt këtyre vendeve gjatë pesë viteve të shkuara. Për këdo që ka qenë në Irak dhe Siri gjatë këtyre viteve do të kërkohet vizë hyrjeje për në SHBA.
Po ashtu, vendeve që përfitojnë nga programi “Visa Waiver” do t’u kërkohet të ndajnë informacion me SHBA-të në lidhje me terrorizmin, ndryshe do të përjashtohen nga programi. Udhëtarët do të kalojnë në sitën e të dhënave të Interpolit gjatë kontrolleve, e vendeve të përfshira në program do t’u duhet të lëshojnë pasaporta me informacion biometrik.
Masat ligjore të miratuara në Dhomën e Përfaqësuesve janë mbështetur dhe nga Shtëpia e Bardhë, dhe në përkrahje të tyre kanë qenë si demokratët dhe republikanët. /tesheshi.com/
