Marrëveshja e arritur në Gjermani mes bllokut konservator të kancelares Merkel dhe socialdemokratëve parashikon një legjislacion të ri për integrimin e emigrantëve.
Sipas këtij legjislacioni, azilkërkuesve do t’u ndërpritet mbështetja nëse i kundërshtojnë masat e detyrueshme të integrimit, si kurset e gjuhës apo mësimet për ligjet gjermane.
Kancelarja Merkel do të deklaronte se Gjermania përballet me dy sfida, me të atë kontrollimit të valës së refugjatëve në Europë, e me atë të regjistrimit dhe të integrimit të të ardhurve tashmë.
“Ne do të kemi një ligj gjerman mbi integrimin. Kjo është hera e parë që ndodh në Gjermaninë e pas luftës. Eshtë një hap i rëndësishëm, cilësor.”
Duke iu referuar ligjit të propozuar nga koalicioni qeverisës, emigrantëve që do të arrijnë në Gjermani do t’u kërkohet të mësojnë gjuhën.
Atyre do t’u thuhet ku të jetojnë, e do të duhet të ndjekin kurset e gjuhës dhe trajnimet për punë.
Po ashtu planifikohet të hiqen pengesat për tregun e punës dhe të krijohen 100.000 vende pune për azilkërkuesit me pagesa të ulëta.
Çdo emigrant që nuk do ta pranojë ofertën e ndihmës mund të humbë përfitimet dhe lejen e banimit.
Eshtë parashikuar gjithashtu dhe shmangia e krijimit të getove të emigrantëve. Kështu, kush lëviz nga vendi ku është sistemuar, mund të penalizohet.
Zëvendëskancelari gjerman, Sigmar Gabriel, e quajti legjislacionin e propozuar një hap historik drejt pranimit të “modernizimit dhe hapjes së shoqërisë sonë.” /tesheshi.com/
