Parlamenti hungarez miratoi ndalimin automatik të të gjithë azilkërkuesve që do të mbahen në kampe në kufijtë jugorë të vendit, duke hedhur poshtë gjithë shqetësimet e shprehura nga organizatat e të drejtave të njeriut.
Ligji mori miratimin e një shumice dërrmuese. Ai ishte hartuar në përgjigje të sulmeve të fundit terroriste në Europë të ndërmarra nga emigrantët. Të paktën kështu pretendoi në mbrojtjen që i bëri ligjit, kryeministri hungarez, Viktor Orbán.
Duke folur në një ceremoni betimi të kontigjentit të fundit të 450 trupave të reja të policisë kufitare në Budapest, Orban e quajti emigracionin “kalin e Trojës së terrorizmit”. “Nëse bota sheh se ne mund të mbrojmë kufijtë tanë.. atëherë askush nuk do të përpiqet të vijë në Hungari në mënyrë të paligjshme”, shtoi ai.
Hungaria edhe më parë, në mënyrë sistematike, ka ndaluar azilkërkuesit, por e ndërpreu këtë praktike në vitin 2013, pas presionit nga Brukseli, agjencia e refugjatëve e OKB-së si dhe nga gjykata europiane e të drejtave të njeriut.
Sipas ligjit, të gjithë azilkërkuesit që hyjnë në Hungari, ashtu si dhe ata që tashmë ndodhen në vend, do të ndalohen ose do të zhvendosen në kampe. Ata nuk do të jenë në gjendje të lëvizin nëpër Hungari apo të largohen nga vendi derisa të shqyrtohet aplikimi i tyre, vetëm nëse kthehen pas përtej kufirit, në Serbi. /tesheshi.com/
