Komisioneri i Lartë i Kombeve të Bashkuara për Refugjatët (UNHCR) tha se ishte “thellësisht i shqetësuar” për projektligjin e azilit të paraqitur nga qeveria e Mbretërisë së Bashkuar.
Deklarata e UNHCR-së tregon se ligji, në formën e tij aktuale, “e detyron Sekretarin Britanik të Brendshëm që t’u mohojë aksesin në sistemin e azilit të Mbretërisë së Bashkuar atyre që hyjnë në vend në mënyrë të parregullt”, shkruan Guardian.
Agjencia e OKB-së paralajmëroi në një deklaratë të martën se azilkërkuesit do të ndalohen në Britani ndërsa po bëhen marrëveshje për transferimin e tyre në një vend tjetër.
“Efekti i projekt-ligjit (në këtë formë) do të ishte refuzimi i mbrojtjes për shumë azilkërkues që kanë nevojë për siguri dhe mbrojtje, madje edhe t’u mohohet mundësia për të paraqitur rastin e tyre. Kjo do të shkelte Konventën për Refugjatët dhe do të minonte traditën e gjatë humanitare për të cilën populli britanik me të drejtë është krenar”, thuhet në deklaratën e UNHCR-së.
Të drejtat themelore
Shumica e njerëzve që ikin nga lufta dhe persekutimi thjesht nuk janë në gjendje të marrin pasaporta dhe viza dhe nuk ka rrugë të sigurta dhe “ligjore” në dispozicion të tyre, sipas UNHCR.
Deklarata kujton se, bazuar në të dhënat e publikuara së fundmi nga Ministria e Brendshme Britanike, shumica dërrmuese e atyre që kanë mbërritur në vend me varka të vogla nëpërmjet Kanalit Anglez, mund t’i jepet statusi i refugjatit pas verifikimit nga autoritetet në Britaninë e Madhe.
Megjithatë, UNHCR shton se etiketimi i refugjatëve në bazë të mënyrës së mbërritjes shtrembëron faktet dhe minon të drejtat e tyre themelore, raporton Guardian.
Kujtojmë në këtë rast se në qendër të problematikës kanë qenë shqiptarët, ata për të cilët Londra ka ngritur alarmin se dynden drejt Britanisë me varka duke kaluar La Manche-n, joshur nga trafikantë kriminelë. /tesheshi.com/
