Kreu i katolikëve shqiptarë, duke folur mbi një mesazh të Papa Franceskut një ditë më parë, ku ky i fundit i bëri thirrje rinisë shqiptare që të mos e lërë Shqipërinë, u detyrua të flasë dhe mbi martesat e të njëjtit seks, mbrojtur së fundi nga Papa me argumentin se dhe ata janë “bij të Zotit”.
Arqipeshkvi i Kishës Katolike për Tiranën dhe Durrësin Arjan Dodaj, foli në Euronews Albania mbi këtë temë të nxehtë, por duke qenë paksa lëmsh në shpjegim, edhe pse homoseksualizmin e krahasoi me një lëmsh.
“Martesa është lidhja natyrore mes burrit dhe gruas. Kështu që në kishën katolike Zoti bekon njeriun, mund të ndodhemi edhe në ujëra të zeza, në vështirësi por nuk do të thotë që Zoti heq dorë nga bekimi për ne. Zoti nuk bekon lëmshin, bekon njeriun. Ka qenë një keqpërkthim, kam lexuar deklaratën e Papës, ai bekon njeriun. Papa thotë nuk është problem të rrëzohesh, problem është të mos ngrihesh”, ishte shpjegimi i Dodajt, pa qenë i qartë nëse Kisha Katolike e pranon apo jo homoseksualizmin dhe më pas martesat e të njëjtit seks. /tesheshi.com/
