Nga Blendi Gashi
Dy ish komandantët e Ushtrisë Çlirimtare të Kosovës (UÇK), Ramush Haradinaj, kryetar i Aleancës për Ardhmërinë e Kosovës (AAK) dhe Fatmir Limaj, kryetar i partisë NISMA për Kosovën, dje u bashkuan për të “luftuar”, jo për çlirimin e vendit, por për të marrë pushtetin, drejtimin e shtetit.
Ndërtuan koalicion parazgjedhor , por përjashtuan partinë e parë opozitare, Lëvizjen Vetëvendosje, me të cilën bashkëudhëtuan për më shumë se shtatë muaj kundër pushtetit aktual.
Ndarja e posteve prishi opozitën e bashkuar, konkretisht, dy partitë më të mëdha opozitare VV e AAK që nuk u dakorduan për të vazhduar rrugën së bashku.
Këto dy parti që deri para disa javësh hidhnin akuza të panumërta në drejtim të partive në pushtet, ditët e fundit kanë drejtuar shigjetat drejt njëra-tjetrës për tradhti, por edhe kush po flitron me partitë në pushtet.
Megjithatë, drejtuesit e AAK-së e NISMA-s pas marrëveshjes së koalicionit që nënshkruan të hënën pasdite, theksuan se dyert e tyre mbesin të hapura për Vetëvendosje-n dhe shoqërinë civile.
Por, Vetëvendosje ka thënë se nuk është ftuar të jetë pjesë e koalicionit parazgjedhor, duke akuzuar AAK-në se ka zbutur qëndrimet ndaj pushtetit dhe se Ramush Haradinaj është afruar me kreun e PDK-së Kadri Veseli.
Mospajtim për lidhjen e koalcionit parazgjedhor mes AAK-së e NISMA-s nuk ka vetëm VV, por edhe përfaqësues të subjekteve nënshkruese të koalicionit.
Anëtari i Kryesisë së NIMAS-së, Xhevat Bislimi përmes një statusi në rrjetin social Facebook, ka qenë i pari që ka komentuar nënshkrimin e koalicionit duke shprehur mospajtimin e tij për këtë marrëveshje
“Koalcioni AAK – NISMA çon ujë në mullirin e koalicionit të Rashkës”, ka shkruar Bislimi, në Facebook.
Por, si e shohin analistët politik ndërtimin e koalicionit AAK-NISMA?!
Analisti politik, Nexhmedin Spahiu, thotë se dy partitë opozitare AAK e NISMA u bën bashkë me qëllim për të marrë pushtetin.
Spahiu nuk e përjashton mundësinë që koalicioni parazgjedhor i ndërtuar nga dy partitë opozitare të dalë i dyti pas mbajtjes të zgjedhjeve të përgjithshme, por për të kuptuar një gjë të tillë, ai thotë se duhet pritur se si do të sillen partitë në fjalë ndaj shoqërisë civile.
“AAK e NISMA janë bërë bashkë për të marrë pushtetin. Vetëvendosje u tregua tepër arrogante duke qenë partia më e madhe opozitare dhe dy partitë opozitare që kanë lidhur koalicion u bashkuan edhe për të tejkaluar në fuqi VV-në”, ka thënë Spahiu, për /tesheshi.com/
Duhanaj: AAK e NISMA do të forcohen
Njohësi i rrethanave politike në vend, Leon Duhanaj, thotë se bashkëpunimi opozitar që në fillim nuk ka qenë i ndërtuar në baza të shëndosha, pasi kauzat e ndërtuara janë shfrytëzuar për manipulim të opinionit por jo për çka vërtet janë bashkuar partitë opozitare.
Por, Duhanaj, beson se dy partitë opozitare që kanë lidhur koalicion parazgjedhor do të forcohen, kurse thotë se partia e parë opozitare Vetëvendosje nëse vazhdon me qasjen e saj mund të shkon drejt shuarjes.
“Koalicioni mes AAK-së e NISMA-s është mëse i qëlluar dhe do t’i shërbej të vërtetës, njëherësh do t’i forcoj që të dyja partitë të cilat do të arrijnë ta mobilizojnë mbështetjen për to. LVV-je, duket të heq dorë nga kjo qasje antishtetërore dhe antibashkëpunuese ose do të përballet me shuarjen e saj graduale”, thotë Duhanaj, për /tesheshi.com/.
Ai më tej shprehet se Vetëvendosje nuk ka gatishmëri për bashkëpunim të sinqertë me asnjërën nga partitë në vend, dhe sipas tij një gjë e tillë është dëshmuar edhe në kohën e VLAN –it, pasi që VV nuk e ka mision ardhjen në pushtet më norma demokratike,por me mënyra tjera, mundësisht revolucionare.
“Bashkëpunimi me AAK-në dhe NISMA-n ka qenë vetëm shfrytëzim i resurseve të tyre për kauzat e veta dhe duke përdorur metoda të papranueshme t’i dëmtoj ato sa ma shumë, në mënyrë që në fund me një plan perfid edhe t’i gëlltis të tërat.
Këtë lojë e ka kuptuar tashmë edhe AAK edhe Nisma e sidomos AAK. LVV tash po e tregon agjendën e vërtet sepse në vend që të merret me qeverinë ajo merret me AAK-në duke i akuzuar si prishës të palëve”, thekson Duhanaj, për /tesheshi.com/.
Njohësi i rrethanave politike, Shkëlzen Maliqi, ka thënë për mediat kosovare se koalicioni AAK – NISMA është një hap i logjikshëm pas përçarjes së opozitës së bashkuar.
“Duke garuar së bashku AAK-ja dhe NISMA shpresojnë se do të mbeten në lojë si faktorë më baraspeshues ndaj Vetëvendosje-s dhe për kombinacionet pas-zgjedhore për ndarjen e pushtetit. Nëse AAK-ja dhe Nisma do të garonin ndaras në zgjedhje, do të ballafaqoheshin me rrudhjen e elektoratit, madje edhe me kapërcimin e pragut prej 5 %, kjo sidomos vlen për NISMA-n”, ka deklaruar Maliqi. /tesheshi.com/
