Tensioni mes Gjermanisë dhe Turqisë mbetet i lartë, pasojë e sjelljes së autoriteteve gjermane, që ndërsa nuk i lejojnë qeveritarët dhe politikanët turq të kenë takime me bashkatdhetarët e tyre, u japin leje mbështetësve të organizatës terroriste PKK të vërshojnë në rrugë për të manifestuar.
Vetëm pak ditë pas pengimit të tubimeve të shtetarëve turq në Gjermani, dje është lejuar në Frankfurt marshimi i 9.000 mbështetësve të PKK-së. Një marshim ku nuk kanë munguar flamujt e banderolat e PKK-së, përpos imazheve të Abdullah Oxhalanit, pas hekurave prej vitesh në Turqi. E gjitha në shkelje të hapur të ndalimit nga qeveria federale gjermane e simboleve terroriste në vendet publike.
Standardi i dyfishtë i autoriteteve gjermane ka sjellë reagimin e zëdhënësit të presidentit turk, që ashpër e ka dënuar atë.
Për Ibrahim Kallënin, Gjermania po mbështet qartas terrorizmin.
“Ata të cilët përpiqen ta shpjegojnë këtë qëndrim armiqësor me lirinë e shprehjes dhe tubimit, duhet të veprojnë me seriozitet,” deklaroi ai një ditë më parë.
Nuk është e mundur, tha Kallën, të shpjegohet pretendimi se, ndërsa terroristët trajtohen si aktorë legjitimë, takimet e përfaqësuesve të zgjedhur të Turqisë me qytetarët e tyre janë të rrezikshme!
Zëdhënësi i presidentit Erdogan kujtoi me këtë rast se disa vende europiane po përpiqen të ndërhyjnë në referendumin e 16 prillit, në mbështetje të votës “jo”.
“Ne u kujtojmë përsëri vendeve europiane se nuk do të vendosë Europa më 16 prill, por vullneti popullor turk,” u shpreh Ibrahim Kallën. /tesheshi.com/
