Mijëra njerëz kanë dalë sot në një marshim në rrugët e Londrës për të kërkuar qëndrimin në Bashkimin Europian. Flamuj të shumtë të BE-së janë parë të mbahen nga marshuesit, ashtu siç janë dëgjuar slogane në përkrahje të BE-së.
Organizatorët e marshimit flasin për 50.000 pjesëmarrës, kurse organet policore pretendojnë një pjesëmarrje në kufijtë e 30.000 njerëzve.
“Marshimi për Europën” është organizuar në median sociale, si një reagim ndaj rezultatit të referendumit. Pjesëmarrësitë kërkojnë qëndrimin në BE, nën thirrjet, “Ne e duam BE-në”.
Britanikët votuan pro daljes nga BE-ja në referendumin e 23 qershorit, por Londra votoi për qëndrimin në të. 60 për qind e votuesve londinezë u shprehën me votën e tyre pro qëndrimit në BE.
Mes banderolave e pankartave të protestuesve shkruhej mes të tjerash, “Brezi im do të qëndrojë”, “E ardhmja jonë është vjedhur”.
Një peticion i nënshkruar nga katër milionë njerëz bën thirrje për një referendum të dytë pas atij të 23 qershorit, në kërkim të ndryshimit të vendimit për Brexit-in.
Rezultati i referendumit ka sjellë pështjellim në tërë shoqërinë britanike, e posaçërisht në partitë politike të vendit, që janë përfshirë nga tensione në gjirin e tyre.
Udhëheqësit dhe zyrtarët e BE-së kanë kërkuar ndërkohë një procedim të shpejtë nga ana e Britanisë, për t’i bërë sa më të vogla dëmet e natyrshme të kësaj periudhe tranzitore. /tesheshi.com/
