Me rastin e Ditës së Konventës Ndërkombëtare për të Drejtat e Fëmijës, zyra e UNICEF në Kosovë, “Save the Children” dhe koalicioni i OJQ-ve për Mbrojtjen e Fëmijëve – KOMF, organizuan marshin e fëmijëve për të drejtat e tyre.
120 fëmijë filluan marshin nga Sheshi “Zahir Pajaziti” deri tek Sheshi “Skënderbeu”.
Fëmijët mbartën me vete pankarta të shtypura me mesazhe adresuar prindërve, qeverisë, deputetëve dhe gjithë shoqërisë mbi promovimin dhe mbrojtjen e të drejtave të tyre. Mesazhet e tyre ishin: “Politikanë vetëm një punë e keni, na bëni të lumtur”, “Mos merrni vendime për ne, PA NE!”, “A po i rregulloni tekstet, e lehtësoni çantat tona, apo po e leni krejt këtë punë?”, “Ju nuk po e shihni, por dhuna është kudo mes nesh, na ndihmoni mos ta përjetojmë!”.
Pas marshit, fëmijët vazhduan në kuvend, për të mbajtur një seancë plenare të drejtuar nga vetë fëmijët, me mesazhin “Fëmijët udhëheqin kuvendin”. Hapja e seancës plenare u bë nga Trina Hoti, Kryesuese nga radhët e fëmijëve.
Fëmijët u pritën në Kuvend nga Kryetari Kadri Veseli dhe deputetët.
Fëmijët u deklaruan për prioritetet, shqetësime dhe rekomandimet, sikurse rëndësinë e të pasurit Ligjin për Mbrojtjen e Fëmijës; Shëndetin dhe mirëqenien; Arsimi cilësor dhe gjithëpërfshirës; Fëmijët me aftësi të kufizuara; Fëmijët e riatdhesuar; Pjesëmarrjen e fëmijëve në vendimmarrje etj.
Në fund të seancës plenare fëmijët paraqitën dhe votuan rezolutën, ku të njejtën ia dorëzuan Kryetarit të Kuvendit.
Pas përfundimit të seancës plenare, përfaqësues të fëmijëve bashkë me UNICEF, Save the Children dhe KOMF, u pritën nga kryeministri Haradinaj.
Fëmijët adresuan pikat e rezolutës drejt kryeministrit duke kërkuar angazhimin e tij në avancimin e mbrojtës së të drejtave të tyre. /tesheshi.com/
