Dhjetëra mijëra protestues kanë dalë në rrugët e Tel Avivit qendror për të protestuar kundër korrupsionit në qeverinë e kryeministrit Benjamin Netanjahu.
Ky është i “Marshi i turpit”, i treti me radhë, që është mbajtur të shtunën mbrëma në Rothschild Boulevard, një nga rrugët kryesore të qytetit. Demonstruesit brohoritën slogane si, “Netanjahu në burg!”. Qindra vetë marshuan gjithashtu në Haifa, Rosh Pina dhe Afula.
Protestuesit kryesisht janë të zemëruar nga një projekt-ligj i ri i cili do të parandalonte policinë nga publikimi i rekomandimeve mbi aktakuzat. Projektligji kundërthënës besohet se është hartuar për të mbrojtur Netanjahun, i cili aktualisht është nën hetim për dy skandale korrupsioni të profilit të lartë, duke e mbajtur publikun në errësirë.
Hetimi i parë përfshin pretendimet se ai ka pranuar dhurata luksoze nga biznesmeni i pasur, i ashtuquajturi ‘Rasti 1000’, dhe i dyti përfshin pretendimet se ai negocioi një marrëveshje me një pronar gazete për një mbulim më të favorshëm të rastit në gazetë, i quajtur ‘Rasti 2000’.
Të premten, miliarderi australian James Packer dëshmoi se i kishte dhënë dhurata Netanjahut, sipas kërkesave të kryeministrit dhe të manjatit të filmit Arnon Milchan.
Në tubimin e parë dy javë më parë, rreth 30,000 protestues marshuan përgjatë Rothschild Boulevard në sheshin Habima, shumë prej të cilëve thërrisnin që Netanjahu të mbyllet në burg.
Një ditë pas tubimit, i dorëzuar para presionit publik, Netanjahu njoftoi se i kishte kërkuar ligjvënësve të përpilonin një projektligj të ri në mënyrë që të mos zbatohej për hetimet kundër tij. /tesheshi.com/
