Lojërat Olimpike të Rio de Zhanjeros janë mbyllur me një ceremoni në stadiumin mitik “Maracana”. Një ceremoni plot me ngjyra, e cila ka zgjatur për thuajse tre orë dhe ku nuk ka munguar asgjë.
Këto Lojëra i ka mbyllur zyrtarisht presidenti i Komitetit Olimpik Ndërkombëtar, Thomas Bach. Ai e ka çmuar lart aktivitetin, duke e përshkruar me këto fjalë, “Lojëra të mrekullueshme në një qytet të mrekullueshëm”.
Lojërat e olimpiadës së 31-të janë mbyllur pas 16 ditëve gara të njëpasnjëshme, ku morën pjesë 11.303 sportistë nga 206 vende, e mes tyre dhe një ekip refugjatësh.
Në ceremoni qe pjesëmarrës dhe kryeministri i Japonisë, Shinzo Abe, i cili u prit me ovacione për paraqitjen e tij. Lojërat e pas katër viteve do të zhvillohen në Tokio.
Ceremonia përmbyllëse u transmetua drejtpërdrejt dhe u ndoq nga miliarda njerëz anekënd botës.
Ekipi më i suksesshëm i këtyre Lojërave qe ai amerikan. Shtetet e Bashkuara të Amerikës e kryesyan me distancë të madhe renditjen sipas medaljeve të fituara. 121 medalje për sportistët e SHBA-ve, 46 të arta, 37 të argjendta e 38 të bronzta. Më pas erdhën Britania e Madhe, Kina, Rusia, Gjermania, Japonia e Franca.
Këto Lojëra Olimpike u paraprinë nga debati mbi pjesëmarrjen e sportistëve rusë, për t’u pasuar nga medaljet e notarit amerikan Michael Phelps, te vrapimi i pandalshëm i atletit të Xhamajkës, Usain Bolt, që plotësoi një “treshe të trefishtë” medaljesh, te fitimi i medaljes së arit nga përfaqësuesja braziliane e futbollit, për të përmendur vetëm pak prej gjërave më pikante të Rio 2016-tës. /tesheshi.com/
