Nuk ishin vetëm marrëveshjet prej 50 miliardë dollarësh të Turqisë me Emiratet që Erdogan siguroi gjatë vizitës së tij të fundit atje.
Ndër 13 marrëveshjet që betonojnë marrëdhëniet mes dy vendeve është një që prek një rival të presidentit të Turqisë, një “dhuratë” e emirëve, ajo që ka të bëjë me marrëveshjen e ekstradimit midis Turqisë dhe Emirateve, e cila mund të rrezikojë kriminelët turq që kanë ikur atje.
Emiratet janë konsideruar prej kohësh një strehë e sigurt për kriminelët ballkanikë, përfshirë shqiptarët dhe turqit, raporton Balkan Insight. Deri vonë ka qenë shumë e vështirë ekstradimi i kriminelëve të kërkuar nga Emiratet, pasi ata ata e blenë “banesën” e tyre të sigurt duke investuar shuma të mëdha parash në vend.
Midis tyre është Sedat Peker, një drejtues i dënuar krimi, i cili sulmoi qeverinë turke me një seri videosh në YouTube, ku pretendohej se qeveria e Erdoganit kishte një mijë të zezat.
Peker kaloi gati dy vjet në Ballkan, përpara se të ikte në vendin e Gjirit ku ai jeton tani, për dy vjet të tjera, nën izolim dixhital.
Avokati i Pekerit argumenton se nënshkrimi i marrëveshjes nuk do të thotë në vetvete që klienti i tij do të ekstradohet në Turqi, por hapësira e Pekerit për lëvizje tani është e kufizuar.
Transmetimet në internet të Pekerit janë ndalur, pas presionit të Emirateve që ka dërguar një sërë mesazhesh Pekerit se ekstradimi në Turqi mund të mos jetë larg.
Krahu i tij i djathtë, Emre Ulur, u arrestua në Tiranë shtatorin e kaluar dhe u ekstradua në Turqi.
Duke qenë se arrestimi i Ulur erdhi para zgjedhjeve presidenciale turke, u interpretua si mbyllje e një fronti nga Erdogan në rrugën drejt qendrave të votimit.
Fitorja e Erdoganit në maj dhe rinxehja e marrëdhënieve të Turqisë me Emiratet tregojnë se baza ligjore për një ekstradim është tashmë në vend dhe se kufiri për Pekerin është ngushtuar në mënyrë të rrezikshme. /tesheshi.com/
