Katër shtete të rajonit si Shqipëria, Kosova, Maqedonia dhe Mali i Zi kanë hartuar një strategji të re, për të shmangur rrezikun nga përmbytjet. Institutet hidro-meteorologjike të këtyre vendeve nënshkruan në Prizren një memorandum, për shkëmbimin e të dhënave në kohë reale, në mënyrë që qytetarët të paralajmërohen në kohë për pasojat e motit të përkeqësuar.
Gerrit Bodenbender, drejtor i projektit të mbështetur nga qeveria gjermane tha se situata e javës së shkuar evidenton se kjo marrëveshje është një garanci, që në situata të ngjashme, banorët do të jenë të informuar në kohë. Për rrjedhojë, dëmet ekonomike dhe sociale do të jenë më të shmangshme.
Ndërkohë, kreu i Institutit Hidro-meteotologjik të Kosovës, Hasan Hasani thotë se “këtu kemi ardhur të prezantojmë një pajisje që e kemi marrë nga donacioni GIZ gjerman. Kjo është një paisje e re, që në të njëjtën kohë llogarit shpejtësinë, thellësinë dhe prurjen e lumenjëve”.
Në të njëjtën linjë mendimi ishte edhe përfaqësuesi i hidrologjisë shqiptare, Klodian Zaimi. “Kemi kohën e domosdoshme për të lajmëruar popullatën në Shqipëri, në lidhje me përmbytjet e mundshme që mund të vijnë nga lumi Drin, e më pas nga lumi Buna”, tha Zaimi./tesheshi.com
