Kryeministri i Malit të Zi, Dritan Abazoviç, i cili është në vizitën e tij të parë në Kosovë së bashku me tre ministra dhe kryetarë të disa komunave, ka takuar kryeministrin e Kosovës, Albin Kurti, me të cilin ka nënshkruar Marrëveshjen për trafikun ajror ndërmjet Kosovës dhe Malit të Zi.
Pas takimit, dy kryeministrat në një deklaratë për mediat theksuan bashkëpunimin e mirë mes dy vendeve, si shembull për rajonin.
Në deklaratën e tij, Kurti tha se Mali i Zi e ka njohur pavarësinë e Kosovës që nga shpallja e saj në vitin 2008 dhe se të dy vendet janë duke bashkëpunuar ngushtë sot si dy vende fqinje për të promovuar paqen, sigurinë dhe prosperitetin në rajon.
Duke folur për marrëveshjen e nënshkruar me homologun e tij malazez, ai tha se është një hap i rëndësishëm dhe i domosdoshëm për rregullimin e hapësirës ajrore mes dy vendeve.
“Marrëveshja që nënshkruam sot ofron mundësi të reja për zhvillimin e aviacionit civil, mundëson shkurtimin e rrugëve ajrore dhe kohëzgjatjes së fluturimeve me 15 minuta. Një linjë ajrore që dikur fluturonte katër herë në ditë, me këto kontrata mund të shtoni lehtësisht një fluturim tjetër. Më pas zvogëlohet emetimi i gazrave serrë dhe zvogëlohen kostot e fluturimeve, gjë që ndikon në çmimin e biletave për udhëtarët”, ka theksuar Kurti.
Kurti tha se në vitin 2022 eksportet e Kosovës drejt Malit të Zi janë rritur për 55 për qind krahasuar me vitin 2021, ndërsa në pikat kufitare me Malin e Zi janë regjistruar më shumë se gjysmë milioni hyrje-dalje të qytetarëve, pa llogaritur hyrjet përmes Shqipërisë.
Bashkëpunim në nivel të lartë
Abazoviç, i cili iu drejtua mediave në gjuhën malazeze dhe shqipe, tha se fokusi i të gjitha marrëdhënieve të ardhshme mes dy vendeve është bashkëpunimi ekonomik dhe transporti më i lehtë i popullsisë.
“Sot patëm rastin të bisedonim me kryeministrin dhe bashkëpunëtorët e tij për disa projekte të rëndësishme infrastrukturore, do të thosha historike për të dy vendet, pra në radhë të parë për lidhjen e Plavës dhe Deçanit, ndërtimin e një rruge dhe një tuneli që do të lidhë dy zonat. Është e një rëndësie të veçantë për Malin e Zi, besoj se është edhe për Kosovën, por edhe për zhvillimin e infrastrukturës rrugore ndërmjet Pejës dhe Rozhajt”, tha Abazoviç.
Ai tha se sot është nënshkruar një dokument shumë i rëndësishëm për qiejt e lirë mbi Kosovë dhe mbi Malin e Zi, nga i cili do të përfitojnë të gjithë udhëtarët ajror dhe qytetarët e të dy vendeve.
Abazoviç theksoi se Kosova ka një partner të madh në Mal të Zi dhe tha se është i sigurt se së shpejti do të ketë investime të mëdha nga biznesi kosovar në Mal të Zi.
Ai shtoi se në këtë kontekst, ideja e përbashkët e dy kryeministrave është organizimi i një Forumi Biznesi që do të bëjë bashkë njerëz nga sektori i biznesit nga të dyja vendet për të parë në komunikim të drejtpërdrejtë se çfarë mundësish të tjera ka për bashkëpunim.
Ai ftoi të gjithë qytetarët e Kosovës që pushimet verore t’i kalojnë aty ku vijnë tradicionalisht dhe të dinë se janë mëse të mirëpritur në të gjitha qytetet e Malit të Zi, jo vetëm në Ulqin, ku ka më së shumti, por edhe në qytete të tjera. /tesheshi.com/
