Armenia, Azerbajxhani dhe Rusia kanë konfirmuar se kanë nënshkruar një marrëveshje që i jep fund konfliktit ushtarak në rajonin e Nago-Karabakut, pas më shumë se një muaj gjakderdhje.
Kryeministri armen Nicole Pashinyan njoftoi lajmin e nënshkrimit të marrëveshjes në mediat sociale herët në mëngjes të martën, pas së cilës u konfirmua nga Kremlini dhe Presidenti i Azerbajxhanit Ilham Aliyev.
“Deklarata e nënshkruar trepalëshe do të jetë një pikë kyçe në zgjidhjen e konfliktit,” tha Aliyev në një takim televiziv me Presidentin rus Vladimir Putin.
Putini tha se paqeruajtësit rusë do të vendosen përgjatë kufirit të Nago-Karabakut dhe përgjatë korridorit midis rajonit dhe Armenisë.
Ai tha se shpresonte që marrëveshjet “të krijonin kushtet e nevojshme për një zgjidhje afatgjatë dhe të plotë të krizës së Nago-Karabakut”.
Ministri rus i mbrojtjes ka konfirmuar se Rusia ka filluar vendosjen e gati 2,000 paqeruajtësve, ndërsa Aliyev ka njoftuar pjesëmarrjen e Turqisë në procesin e paqeruajtjes.
Gjashtë javë luftime
Deklarata u nënshkrua pas gjashtë javësh luftimesh dhe përparimit të forcave azerbajxhanase.
Baku tha të hënën se kishte marrë disa dhjetëra vendbanime të tjera në Nago-Karabak, një ditë pasi deklaroi fitoren në betejën për një qytet të rëndësishëm strategjikisht.
“Vendimi u mor në bazë të një analize të kujdesshme të situatës në fushën e betejës dhe bisedimeve me ekspertët më të mirë në terren,” u citua kryeministri armen nga Reuters.
“Kjo nuk është një fitore, por nuk ka humbje nëse nuk e konsideroni veten të mundur. Ne kurrë nuk do ta konsiderojmë veten të mundur dhe ky do të jetë një fillim i ri i bashkimit tonë kombëtar dhe rilindjes,” shtoi Pashinyan.
Luftimet, të cilat besohet se kanë vrarë disa mijëra njerëz, kanë ngritur frikën se lufta mund të përfshijë rajonin e gjerë, pasi Turqia mbështet Azerbajxhanin, ndërsa Rusia ka një marrëveshje me Armeninë, ku ka gjithashtu një bazë ushtarake. /tesheshi.com/
