Nga Ylli Pata
Edhe pse kanë kaluar mbi tre javë nga samiti i Ballkanit në Podgoricë, ku mori pjesë zv.presidenti amerikan Mike Pence, sërish dalin detaje që duket se do të sjellin një ndryshim të rëndësishëm në Ballkan, si dhe të reja që kanë të bëjnë edhe me zhvillimet më të fundit në Kosovë.
Siç mësohet, në Podgoricë është vulosur gjithashtu që të ngrihet përfundimisht ushtria e Kosovës, e cila në fillim të vitit 2018 do të furnizohet me armë e logjistikë amerikane.
Po ashtu, është vendosur që më 22 tetor Parlamenti i Kosovës të miratojë ligjin për ushtrinë, i cili do të hyjë në fuqi në fillim të nëntorit.
Ushtria e re e Kosovës, nuk do të presë serbët për t’u themeluar, por kjo nuk do të thotë se nuk do të jetë multientike. Madje nr. 2 i saj pritet të jetë një oficer i pakicës malazeze, ndërkohë që në Shtabin e Përgjihshëm të saj do të marrin pjesë edhe ushtarakë të pakicës boshnjake.
Në bisedën ndërmjet Presidentit Hashim Thaçi dhe zv.presidentit amerikan Mike Pence, është vendosur që qeveria e re e Kosovës të mos jetë thjeshtë një mazhorancë e brishtë e PAN-it, por një qeveri gjithëpërfshirëse ku do të marrin pjesë edhe deputetë të AKR-së dhe LDK-së.
Pikërisht kjo mazhorancë që do të udhëheqë Kosovën në qeverinë e saj, do të jetë dhe ajo që do të garantojë miratimin e ushtrisë së re, por që dhe do të miratojë një reformë të re në drejtësi, për të ndalur ndikimin politik në gjyqësor.
Siç mësohet, vonesa e themelimit të institucioneve të Kosovës e ka bazën pikërisht tek rezistenca e disa drejtuesve politikë të PAN-it, të cilët nuk janë të përfshirë në planin e Fuqive të Mëdha për drejtimin e institucioneve të Kosovës.
Koalicioni PAN ka 39 deputetë, pakicat pa serbët kanë 11 deputetë. E për të qeverisur shumicës i duhen më shumë se 11 deputetë që të ketë mundësi edhe për të kaluar ligje të rëndësishme siç është ai i Ushtrisë, i cili nuk do të miratohet nga Lista Serbe, që sipas gjasave mund të rrëzojë edhe qeverinë për këtë gjë.
Ndaj është bërë plani dhe negociatat që në qeveri të futen mbi 14 deputetë nga LDK dhe AKR.
Qeveria e ardhshme sipas të gjitha gjasave do të jetë një koalicion i madh gjithëpërfshirës, dhe sipas një burimi të rëndësishëm diplomatik çdo gjë do të mbyllet me 5 shtator.
I pyetur se kush do të jetë kryeministri i ri, diplomati tha se aleatët respektojnë dhe do të njohin çdo qeveri që del në mënyrë sovrane nga Parlamenti i Kosovës.
Vetëvendosje dhe koalicioni i LDK-së me AAK-në i kanë që sot 61 vota numerikisht, por realisht ka deputetë brenda këtyre grupimeve që pritet të kalojnë në anën tjetër, duke rritur pazarin e tyre politik.
Vetëvendosje ka 32 deputetë dhe koalicioni LDK plus AKR kanë 29 deputetë. Pra, nëse Albin Kurti do të kishte vullnetin e partisë së Isa Mustafës, ai mund të jetë që sot kryeministër i Republikës së Kosovës edhe pa votat e Listës Serbe.
Këtë PAN-i e di, ndaj deklaroi dje në një farë mënyre kapitullimin, duke shpresuar se do të arrijë një marrëveshje në ditët në vazhdim.
Por edhe nëse arrihet kjo marrëveshje, nuk do të jetë i PDK-së kryetari i Parlamentit, i cili ka shumë gjasa që të jetë i Vetëvendosjes apo LDK-së nëse qeverinë do ta marrë Ramush Haradinaj, dhe i AAK-së nëse qeverinë do ta formojë Albin Kurti.
Këto janë opsionet e fundit që po qarkullojnë diplomatët. /tesheshi.com/
