Izraeli ka marrë vendimin dhe nuk ka pranuar një marrëveshje me Iranin, duke mos u tërhequr nga përballja me Shtetet e Bashkuara të Amerikës.
Vetë Kryeministri Benyamin Netanyahu ka deklaruar në një deklaratë për shtyp se nuk do të zbatojë në mënyrë absolute marrëveshjen me Teheranin, të arritur në Lozanë, në prani të fuqive ndërkombëtare.
“Kjo marrëveshje është një rrezik për botën dhe do të revokonte marrëveshjet e arritura deri më tani, ndërsa Irani do të intensifikonte politikën e tij të terrorit. Kërkojmë që çfarëdo marrëveshje përfundimtare me Iranin të përfshijë njohjen pa asnjë kusht të Shtetit të Izraelit. Marrëveshja përfundimtare duhet të firmoset brenda 30 qershorit”,- ka thënë Netanyahu.
Për Shtëpinë e Bardhë dhe Barack Obamën, ky është një moment shumë i rëndësishëm dhe domethënës. Çdo president amerikan ka dashur të lejë një mesazh të rëndësishëm për këtë çështje në veçanti për botën në përgjithësi. Obama nuk ka mundur të arrijë rezultate mes Izraelit dhe Palestinës.
“Kam vepruar përherë për të ndaluar që Irani të ketë bombën atomike, por zgjidhja diplomatike është më e mira dhe nëse Irani respekton paktet, do të mund të bashkohet me komunitetin e e shteteve të tjera ndërkombëtare”,- ka thënë Obama.
Për të, problemi nuk është vetëm Izraeli, pasi brenda afatit të 30 qershorit, Shtëpia e Bardhë kërkon të arrijë në marrëveshje edhe me Arabinë Saudite dhe vendet e Gjirit Persik.
“Nëse Kongresi saboton këtë marrëveshje pa një alternativë të arsyeshme, Shtetet e Bashkuara do të akuzohen si shkaktarë të dështimit të negociatave diplomatike. Do të jetë një dështim për të gjithë ne dhe rrezikojmë hapjen e një konflikti të ri”,- ka qenë reagimi i shefit të Shtëpisë së Bardhë./tesheshi.com/
