Konflikti midis qipriotëve turq dhe grekë për një lloj special djathi mori drejtim të ri drejt zgjidhjes ndërsa BE njoftoi se do ta njohë produktin me dy emra, një grek dhe një turk.
Ky vendim i BE shihet si nje lëvizje pozitive drejt ribashkimit të ishullit të ndarë të Qipros.
Kështu, sipas BE djathi do të regjistrohet me emrin “Χαλλουμι [Halloumi]” në greqisht dhe “Hellim” në turqisht në markat e mbrojtura të origjinës, sistem që lejon produktet me origjinë nga një rajon i caktuar të identifikohen me emrin e rajonit.
Konflikti ka angazhuar vetë presidentin e Komisionit Europian, Jean-Claude Juncker i cili në një deklaratë tha se ky hap tregon angazhimin e të dyja komuniteteve qipriote për të punuar së bashku në projekte që unifikojnë rajonin.
“Djathi Halloumi/Hellim simbolizon trashëgiminë e përbashkët të ishullit të Qipros, është një traditë që lidh komunitetet që jetojnë atje me shekuj”, thuhet në deklaratë.
Djathi në fjalë prodhohet nga një miks qumështi dhie dhe deleje në Qipro e përbën produktin më të njohur dhe me vlerë për ekonominë e ishullit.
Vitin e kaluar, administrata greko-qipriote aplikoi në BE për njohjen e produktit duke shkaktuar shqetësim tek prodhuesit turko-qipriotë që druheshin se kjo mund të ndikonte ne eksportet e tyre.
Marrëveshja për djathin i shtohet heqjes së vizave mes dy pjesëve të ishullit si pjesë e negociatave për pajtim. Bisedimet e ribashkimit kanë nisur në maj kur i sapozgjedhuri president i Qipros Turke, Mustafa Akinci u takua me liderin greko-qipriot, Nicos Anastasiades në zonën neutrale në Nikozia./tesheshi/
