Duke qeshur, sekretari amerikan i Shtetit, Xhon Kerri pohoi se dita e marrëveshjes me Iranin, ishte historike edhe për të personalisht, pasi si tha, pas aksidentit me biçikletë më 31 Maj kur theu këmbën, ishte hera e parë që mund të vishte një palë këpucë.
Por, në realitet, vënë në dukje disa analistë me firmën e tij nën marrëveshjen historike bërthamore me Iranin, Kerry ka hyrë vërtet në histori, e ka shënuar një fitore ndaj kritikëve që në javët e fundit e kishin sulmuar shumë ashpër.
Ka nga ana ata, që pretendonin, si p.sh senatori republikan John McCain, se Kerry dëshironte “dëshpërimisht” një marrëveshje që të linte një trashëgimi nga karriera e tij tridhjetëvjeçare në politikë.
Një karrierë, që si pohon edhe revista “Politika” gjatë së cilës Kerry ka propozuar pak ligje të rëndësishme, ka fituar nominimin në kampin demokrat për Presidencialet në 2004, zgjedhje që i humbi, ndërsa si sekretar Shteti ka bërë përpjekje të pasuksesshme për të përmbajtur synimet ruse në Ukrainë e për të bërë progres në bisedimet e paqes në Lindjen e Mesme.
Ka të tjerë që i atribuojnë një punë të madhe sekretarit Kerry për marrëveshjen me Iranin, shumë përpara se të thirrej nga presidenti Obama për të drejtuar diplomacinë amerikane.
Ishte ai që si kryetar i komisionit të Jashtëm të senatit, fluturoi në mënyrë sekrete në Mascate në 2011 për t’i kërkuar sulltant të Omanit të ndërmjetësonte takimet mes Shteteve të Bashkuara dhe Iranit, bisedime që nisën më në fund dy vjet më parë.
Këto përpjekje tashmë shtyjnë shumë të mendojnë edhe për një kandidaturë të mundshme për çmimin Nobel për Paqen së bashku me ministrin e Jashtëm Iranian, Javad Zarif. /tesheshi/
Përgatiti: Juli Prifti
