Egjipti dhe Greqia kanë nënshkruar një marrëveshje detare për krijimin e një kufiri detar midis dy vendeve dhe përcaktimin e një zone ekskluzive ekonomike për të drejtat e kërkimit të naftës dhe gazit.
Marrëveshja është një përgjigje ndaj asaj të ngjashmes nga viti i kaluar midis Turqisë dhe qeverisë libiane me qendër në Tripoli, e cila shkaktoi tensione në rajonin e Mesdheut Lindor.
Marrëveshja midis Turqisë dhe Libisë është kundërshtuar gjerësisht nga Egjipti, Qipro dhe Greqia si një shkelje e të drejtave të tyre ekonomike në botën nënujore, e cila besohet të jetë e pasur me naftë. Bashkimi Evropian thotë se shkeljet turko-libiane të ligjit ndërkombëtar kërcënojnë stabilitetin në rajon.
Greqia dhe Turqia kanë qenë në mosmarrëveshje mbi kufijtë detarë për dekada të tëra, dhe zbulimet e fundit të gazit natyror dhe planet e shpimit nëpër Mesdheun lindor kanë përkeqësuar mosmarrëveshjen.
“Kjo marrëveshje lejon Egjiptin dhe Greqinë të bëjnë të maksimizojnë përfitimet e tyre nga burimet e disponueshme në këtë zonë ekskluzive ekonomike: rezervat e mundshme të naftës dhe gazit,” tha ministri i Jashtëm egjiptian Sameh Shoukry pas një ceremonie të shkurtër nënshkrimi në Kajro.
Ai shtoi se “marrëdhëniet egjiptiane-greke janë vendimtare për ruajtjen e sigurisë dhe stabilitetit në rajonin lindor të Mesdheut dhe për shtypjen e kërcënimeve të shkaktuara nga politika të papërgjegjshme që mbështesin ekstremizmin dhe terrorin”, duke aluduar për mbështetjen e Ankarasë ndaj qeverisë në Tripoli.
“Lufta përmes ndërmjetësve”
Në luftën “përmes ndërmjetësve” në Libi, Egjipti është në anën e kundërt nga Turqia dhe ka mbështetur qeverinë rivale me qendër në Libinë lindore dhe udhëheqësin e saj ushtarak Khalifa Haftar. Kajro pretendon se “Turqia po ndihmon ekstremistët në emër të qeverisë në Tripoli”, e cila mbështetet nga Kombet e Bashkuara.
Me mbështetjen ushtarake të Turqisë, qeveria në Tripoli sfidoi fushatën ushtarake 14-mujore të Haftarit për të kapur kryeqytetin libian. Pasi Turqia e përmbysi luftën në Libi, Presidenti egjiptian Abdel Fattah al-Sisi kërcënoi me sulm ushtarak në Libi, duke çuar në shqetësime se mund të ketë një konfrontim të drejtpërdrejtë turko-egjiptian.
Ministri i Jashtëm grek, Nikos Dendias përshkroi marrëveshjen Egjipt-Greqi si një “marrëveshje shembullore”. Sidoqoftë, asnjëri nga të dy ministrat nuk zbuloi detaje të marrëveshjes. “Kjo është e kundërta e plotë e një memorandum mirëkuptimi të paligjshëm, të pavlefshëm dhe ligjërisht jo-ekzistues midis Turqisë dhe Tripolit,” shtoi Dendias.
Turqia argumenton se ishujt grekë nuk duhet të përfshihen në buxhetin e zonave detare me interes ekonomik, një pozicion që Greqia thotë se shkel ligjin ndërkombëtar. Greqia ka pothuajse 6.000 ishuj dhe shkëmbinj nënujorë në detet Egje dhe Jon, nga të cilat më shumë se 200 janë të banuar.
Muajin e kaluar, qeveria greke u alarmua nga plani i Turqisë për të vazhduar kërkimin e naftës dhe gazit në jug të ishujve grekë në Mesdheun lindor, dhe kishte një lëvizje të forcave të armatosura të të dy palëve. /tesheshi.com/
