Ministria e Brendshme gjermane njoftoi të enjten se ishte arritur një marrëveshje me Ankaranë për të braktisur gradualisht programin e dërgimit të imamëve nga Turqia në xhamitë gjermane.
Kjo, besojnë ata, do të përmirësojë integrimin e muslimanëve në shoqërinë gjermane.
Sipas marrëveshjes së Ministrisë së Brendshme gjermane, autoritetit fetar turk Diyanet dhe Shoqatës Islame Turke DITIB, në Gjermani pritet të trajnohen rreth 100 imamë dhe gradualisht do të zëvendësojnë imamët e dërguar nga Diyanet.
“Ne kemi nevojë për udhëheqës fetarë që flasin gjuhën tonë dhe kuptojnë vlerat tona. Ky është një moment historik i rëndësishëm për integrimin dhe pjesëmarrjen e komuniteteve myslimane në shoqërinë gjermane”, tha Ministrja e Brendshme gjermane Nancy Faeser.
Tema e polemikave politike
DITIB, shoqata më e madhe islame në Gjermani, me afro 900 xhami, ka qenë objekt i polemikave politike për disa vite, e fundit prej të cilave ishte një fjalim i një talebani afgan në një nga xhamitë e saj muajin e kaluar, raporton Reuters.
Në vitin 2017, zyrtarët gjermanë i kërkuan DITIB-it të ndërmarrë reforma thelbësore pas akuzave se imamët e saj ishin udhëzuar nga Diyanet për të spiunuar për Ankaranë.
DITIB i mohoi akuzat dhe për këtë rast nuk u ngrit asnjë akuzë. /tesheshi.com/
