Lidhja Arabe njoftoi të shtunën se kundërshton një zgjidhje për konfliktin izraelito-palestinez, të paraqitur në fillim të kësaj jave nga Presidenti amerikan Donald Trump, dhe tha se e konsideronte atë “të padrejtë” për palestinezët.
Organizata u mblodh në Kajro në nivelin e ministrave të Jashtëm arabë, në prani të Presidentit palestinez Mahmoud Abbas, pas njoftimit të planit amerikan që palestinezët e refuzojnë.
Organizata tha në një deklaratë të lëshuar pas takimit se “hedh poshtë marrëveshjen SHBA-Izrael sepse nuk respekton të drejtat themelore dhe aspiratat e popullit palestinez”.
Lidhja Arabe shtoi se udhëheqësit arabë kishin premtuar se nuk do të bashkëpunojnë me administratën amerikane në këtë drejtim.
Drejtuesit arabë insistuan gjithashtu në nevojën për një zgjidhje dy-shtetesh, e cila përfshin krijimin e një shteti palestinez brenda kufijve të vitit 1967, me një kryeqytet në Jeruzalemin Lindor, sektorin palestinez të qytetit të pushtuar dhe aneksuar nga Izraeli.
Në planin e tij, Uashingtoni vlerësoi se Jeruzalemi ishte kryeqyteti i pandarë i Izraelit dhe propozoi krijimin e kryeqytetit të një shteti të mundshëm palestinez në Abu Dis, një periferi të Jeruzalemit.
Palestinezët duan që e gjithë Jeruzalemi Lindor të jetë kryeqyteti i shtetit të tyre.
Pika të tjera të dobëta të planit janë ndërtimi i vendbanimeve izraelite në Bregun Perëndimor të pushtuar që nga viti 1967.
Abbas njoftoi të shtunën shkrirjen e të gjitha marrëdhënieve, përfshirë sigurinë midis Autoritetit Palestinez dhe Izraelit dhe Shteteve të Bashkuara, dhe vlerësoi planin e SHBA “në kundërshtim me Marrëveshjet e Oslos”, të nënshkruar me Izraelin në vitin 1993. /tesheshi.com/
