U nënshkrua në Kryeministri marëveshja për dy satelitët e promovuar gati dy vite më parë nga Rama, Albania 1 dhe Albania 2, pa u specifikuar se do jenë sërish dhuratë turke.
I pari i qeverisjes potencoi dhe njëherë rolin e tyre, thënë në kontekstin e ndërtimeve pa leje.
“Lajmi është që do të kemi një kryeinspektorat në qiell, që nuk ka parti apo kushëri dhe i shikon të gjitha. Me satelitët nuk do të ketë më mundësi të ndërtohen kate pa leje”, theksoi kryeministri, duke iu referuar nënshkrimit të kontratës së Shërbimit Satelitor në fushën e mbrojtjes dhe sigurisë për monitorimin me teknologji të avancuar të territorit të Republikës së Shqipërisë, ndërmjet Agjencisë Kombëtare të Mbrojtjes Civile dhe Operatorit “Satellogic USA Inc”.
Ai më pas potencoi dhe blerjen e dronëve dhe misionin e tyre nga qielli.
“E fundit që kam është se satelitët shumë shpejt do të pasohen nga dronët. Me zhvillimet e reja kemi vendosur të marrim dronë të armatosur që janë për raste ekstreme kundër terrorizmit apo një armiku potencial, por dronët kanë një tërësi funksionesh në komplemantaritet, duke qenë në dinamikë të vazhdueshme duke bërë rakordime apo thellime të të dhënave edhe dronët shumë shpejt do të jenë në dispozicion”, tha Rama.
Ai dhe njëherë iu qas çështjes se ndërtimeve pa leje, duke thënë se nuk është aq e lehtë sa ç’duket frenimi i tyre, pikërisht për shkak të korrupsionit dhe një drejtësie të dobët.
“‘Si ka mundësi që ju i patë vetëm tani? ‘Ku i kishit sytë ju?’, madje edhe mua vetë më drejtohet pyetja ‘si nuk e pe këtë kullë?’ Dhe ky debat për këtë temë ka një natyrë që lidhet jo me konkretësinë e ngrehinave të larta nëpër qytet apo qytete, por lidhet me një marrëdhënie të shtetit në terren me ligjin dhe me qytetarët, me interesin publik dhe me korrupsionin, me zbatimin e detyrave dhe me ryshfetet. Beteja më e madhe dhe më e gjatë një proces shtetndërtimi është beteja për të ndërtuar një tërësi institucionesh që funksionojnë si pjesë e një makinerie që nuk ka emër të përveçëm”, tha kryeministri. /tesheshi.com/
