Një këshilltar i kryeministrit izraelit Benjamin Netanyahu konfirmon në një intervistë për Sunday Times se Izraeli ka pranuar një marrëveshje kornizë për lehtësimin gradual të luftës në Gaza të paraqitur nga presidenti amerikan Joe Biden, por sqaroi se plani ka probleme dhe se ka nevojë për shumë punës ende.
Ofir Falk, këshilltari kryesor i Netanyahut për politikën e jashtme, tha se propozimi i presidentit amerikan ishte “një marrëveshje që ne e miratuam – nuk është një marrëveshje e mirë, por ne me të vërtetë duam që pengjet të kthehen. Të gjithë ata”.
“Ka shumë detaje që duhet të përpunohen,” tha ai, duke shtuar se kushtet izraelite, duke përfshirë “lirimin e pengjeve dhe shkatërrimin e Hamasit nuk kanë ndryshuar”.
Faza e parë përfshin një armëpushim dhe kthimin e disa pengjeve. Më pas, palët do të negociojnë një ndërprerje të hapur të armiqësive për fazën e dytë gjatë së cilës do të lirohen pengjet e mbetura, tha presidenti amerikan.
Kjo sekuencë nënkupton që Hamasi do të vazhdojë të luajë një rol në zgjidhjet graduale që do të bien dakord me ndërmjetësimin e Katarit dhe Egjiptit. Por kjo bie ndesh me qëllimin e deklaruar të Izraelit për të eliminuar Hamasin.
Joe Biden ka përshëndetur një sërë propozimesh për armëpushim në muajt e fundit, secila me një kornizë të ngjashme me atë të paraqitur të premten. Por njëri pas tjetrit u shembën.
Pika kryesore e fërkimit ishte këmbëngulja e Izraelit se do të diskutonte vetëm ndërprerje të përkohshme të armiqësive derisa Hamasi të eliminohej. Hamasi, i cili nuk tregon asnjë shenjë tërheqjeje, thotë se do të lirojë pengjet vetëm si pjesë e një përfundimi të përhershëm të luftës.
Në fjalimin e tij, Biden tha se propozimi i fundit krijon skenën për ditë më të mira për Gazën pa Hamasin në pushtet. Ai nuk shtjelloi se si do të arrihet kjo dhe pranoi se “ka detaje të mjaftueshme për të negociuar për të kaluar nga faza e parë në fazën e dytë”.
Falk përsëriti qëndrimin e Netanyahut se “nuk do të ketë armëpushim të përhershëm derisa të përmbushen të gjitha qëllimet e Izraelit”.
Netanyahu është nën presion ekstrem. Dy partnerët e tij të qeverisë së ekstremit të djathtë po kërcënojnë të largohen nga qeveria në shenjë proteste për çdo marrëveshje që e lë Hamasin të paprekur. Aleati i tij qendror dhe anëtari i këshillit të luftës Benny Gantz dëshiron që marrëveshja të rishikohet.
Qëndrimi i Hamasit
“Fjalimi i Bidenit përfshinte ide pozitive, por ne duam që ato të zbatohen brenda kornizës së një marrëveshjeje gjithëpërfshirëse që plotëson kërkesat tona”, tha dje zyrtari i Hamasit, Osama Hamdan për Al Jazeera.
Hamasi kërkon një fund të garantuar të sulmit izraelit në Gaza, tërheqjen e të gjitha forcave pushtuese, lirinë e lëvizjes për palestinezët dhe ndihmë për rindërtimin e enklavës palestineze.
Zyrtarët izraelitë i kanë hedhur poshtë të gjitha këto terma sepse nënkuptojnë një rikthim në status quo-në e para 7 tetorit. /tesheshi.com/
