Marrëveshja e 18 majit mes kryeministrit Edi Rama dhe kreut të PD-së, Lulzim Basha, vijon të prodhojë diskutime jo vetëm në politikë, por edhe te qytetarët.
Pothuajse 4 muaj nga marrëveshja, Rama shpreson që ajo të vijojë ende, por Basha nga salla e Kuvendit e konsideroi të vdekur.
Dyshimet që nga dita e parë ishin se pika të marrëveshjes mbahen të fshehura dhe në këtë drejtim një pjesë e demokratëve, kryesisht kundërshtarë të Bashës në parti, këmbëngulnin më fort.
Së fundmi në formën e një lajmi apo thashethemi ka dalë variant se në sajë të marrëveshjes, qeveria kishte dëmshpërblyer me 11.6 milionë euro pronarët e pallatit të ndërtuar nga vjehrri i Bashës, që u prish për shkak të zbatimit të projektit të Lungomares së Vlorës.
Një gjë e tillë i është shkruar edhe kryeministrit në rrjetet sociale nga ndjekësit e tij, çka ka detyuruar Ramën që të përgënjeshtrojë gjithçka.
“Mos u zhyt në kazanin mediatik se mund të marrësh vesh edhe që toka është e sheshtë si tepsi”, shkruan Rama në përgjigjen e tij. /tesheshi.com/
