Dy krerët e shtetit turk, presidenti dhe kryeministri i vendit, u kanë dërguar një letër homologëve rusë, ku i urojnë për Ditën Kombëtare të Rusisë.
Erdogani ia përcolli përmes një letre Putinit urimet për festën kombëtare të Federatës Ruse, të kremtuar çdo 12 qershor, duke shprehur dëshirën që marrëdhëniet midis dy vendeve të kthehen në nivelin e merituar.
“Në emër të popullit turk, unë kremtoj Ditën Kombëtare të popullit rus,” thuhet në letrën e Erdoganit për Putinin. “Shpresoj gjithashtu që marrëdhëniet midis Rusisë dhe Turqisë të arrijnë në të ardhmen e afërt në nivelin që meritojnë.”
Zëdhënësi i Kremlinit, Dmitry Peskov, e pohoi marrjen e një letre të tillë nga presidenti turk.
Kjo letër konsiderohet një hap domethënës në përpjekjen për përmirësimin e marrëdhënieve mes dy vendeve.
Një letër të ngjashme i dërgoi dhe kryeministri turk, Binali Jëlldërëm, homologut rus, Dmitry Medvedev.
Marrëdhëniet dypalëshe prekën fundin në nëntorin e vitit të shkuar, kur forcat turke rrëzuan një avion luftarak rus për shkelje të përsëritur të hapësirës ajrore të Turqisë.
Putini do të jepte në maj një sinjal të dëshirës për t’iu kthyer marrëdhënieve të ngushta në të shkuarën, kur do të deklaronte në një konferencë shtypi në Athinë: “Rusia dëshiron t’i rivendosë lidhjet me Turqinë; ne akoma nuk e kuptojmë pse u qëllua dhe u rrëzua avioni ynë.”
Erdogani është shprehur po ashtu kohët e fundit se të dy palët duhet të punojnë së bashku për përmirësimin e marrëdhënieve.
Dërgimi i letrave të urimit premton hapa konkrete në të ardhmen. /tesheshi.com/
