Shqiptarët e Diasporës duket se i kanë dhënë “zemër” kryeministrit, Edi Rama, kur bëhet fjalë për marrëdhëniet e vendit me Greqinë. Ai ka deklaruar se nuk e ka ndërmend të nënshtrohet më, dhe se marrëdhëniet kanë nevojë të ngrihen në një nivel tjetër, tashmë.
“Marrëdhëniet me Greqinë kanë nevojë për t’u ngritur në një nivel tjetër, duke kapërcyer disa probleme që na shfaqen herë pas here përpara, si pengesa të mbetura të së shkuarës. E kemi bërë të qartë që ditën e parë, se nuk kemi ndërmend të heshtim dhe t’i nënshtrohemi fakteve të kryera”, tha Rama, gjatë fjalës së tij, në Samitin e Diasporës, në Pallatin e Kongreseve.
Kreu i qeverisë shtoi se për këtë çeshtje është ngritur një grup i posaçëm dhe është ofruar gadishmëri e plotë, që bashkë me palën greke të diskutohet, sipas Ramës me shpirt kontruktiv nga e ardhmja.
“Ka filluar një punë e përbashkët, aspak e lehtë dhe jemi shumë shpresëplotë që do të mund t’i kapërcejmë këto pengesa, që s’janë në të mirë të kësaj marrëdhënie fqinjësore dhe strategjike. Për një kohë të gjatë, ata u mësuan pak keq, që këtu në Tiranë të kishin bashkëbisedues të nënshtruar, të heshtur dhe që bënin sikur nuk kuptonin”, tha kryeministri.
Rasti i fundit i tensioneve mes dy shteteve ishte shembja e disa objekteve në qendër të Himarës, të cilësuara si ndërtime pa leje, nga ana e qeverisë shqiptare. Por, në këtë situatë reagoi Athina zyrtare, me pretendimin se u cënuan pronat e pakicës kombëtare greke, në zonën turistike.
Kryeministri Rama u kundërpërgjigj menjëherë, duke thënë se “tashmë, ka ikur koha kur fqinji i pasur, i tregonte arat, atij që ishte më i varfër”./tesheshi.com
