Kampioni i botës në fuqi fitoi garën e dytë radhazi në këtë sezon të Moto GP-së.
Marc Marquez e dominoi plotësisht Çmimin e Madh të Spanjës pas një kryesimi që e mori shpejt.
Ai u ndihmua dhe nga një përplasje spektakolare mes tre pilotëve ndjekës, Lorenzo-s dhe Dovizioso-s së Ducati-t, e Pedrosa-s së Repsol Honda-s.
Ky i fundit nuk kishte aspak faj, dhe u godit ndërsa po i parakalonte dy të tjerët. Pedrosa fluturoi në ajër, ndërsa Lorenzo dhe Dovizioso përfunduan në anë të pistës.
Ndërkohë që Marquez siguroi fitoren, në podium u ngjitën dhe Zarco e Iannone, përkatësisht në vend të dytë dhe të tretë.
Kjo ishte gara e katërt sezonale, pas së cilës kryeson Marc Marquez me 70 pikë. Zarco e ndjek spanjollin me 58 pikë. /tesheshi.com/
