Vendet organizatore të dy botërorëve të ardhshëm dihen tanimë, ai i 2018-s do të jetë në Rusi, e ai i 2022-shit në Katar. Por organi qeverisës i futbollit botëror, FIFA, do duhet të zgjedhë organizatorët për turneun pasues, të 2026-s, gjë që nuk do ta bëjë gjer në maj të vitit 2020.
Në skenë për organizimin e tij kanë dalë tre vende, Maroku, Spanja e Portugalia. E përditshmja sportive spanjolle AS bën me dije se mbreti i Marokut, Muhamedi VI, i ka kërkuar mbretit të Spanjës, Felipe VI, të marrë në konsideratë një kërkesë të përbashkët, përfshirë Portugalinë, për të organizuar Kupën e Botës 2026.
Siç thuhet në raportimin e AS-it, rotacioni kontinental i jep përparësi kërkesës së përbashkët amerikanoveriore dhe amerikanoqendrore, por politikat e emigracionit të presidentit Trump mund të bëjnë që gjërat të ndryshojnë.
Presidenti i FIFA-s po ashtu e mbështet një kërkesë për organizim të botërorit në Afrikë dhe Europë, mes vendeve muslimane dhe kristiane. Infantino e sheh këtë si një mundësi unike për të treguar se futbolli mund të ndihmojë në kapërcimin e ndasive kulturore e më gjerë.
Monarku spanjoll, thotë AS, e çmon një kërkesë të përbashkët si një ide të mirë, por do të shkohet më tej vetëm nëse ka mundësi të vërtetë për sukses.
Botërori i 2026-s do të jetë historik për faktin se do të ketë për herë të parë një pjesëmarrje të zgjeruar të 48 përfaqësueseve. /tesheshi.com/
