Prokurorja e Përgjithshme Arta Marku ka këshilluar prokurorët e Fierit të ndjekin veprat penale, dhe jo çdo ngjarje që konstatohet se është në kundërshtim me ligjin. Në analizën e prokurorisë në Fier, Marku vuri në dukje se janë hetuar një numër jashtëzakonisht i papërfillshëm në fushën e tatim-taksave.
“Në Fier operojnë në tregun privat një numër i madh kompanish duke përfshirë në sektorin e naftës dhe gazit. Për vitin 2017 janë hetuar një numër jashtëzakonisht i papërfillshëm në fushën e tatim-taksave, ndërkohë që jemi të vetëdijshëm se sjelljet që cënojnë legjisalcionin tatimor janë të shumta dhe shpesh të ndëshkueshme penalisht. Fshehja e të ardhurave nuk mund të realizohet nga subjektet tregtare pa patur ndihmën dhe bashkëpunimin e nëpunësve të administratës tatimore, të cilët shpeshherë misionin e tyre, atë të mbledhjes së të ardhurave për Buxhetin e Shtetit, e shkëmbejnë me përfitime personale”, citohet të ketë thënë Marku.
Sipas saj, hetimet duhen përqëndruar edhe tek nëpunësit publikë të administratës duke konstatuar frenim i referimeve dhe i hetimeve të veprave penale në fushën e korrupsionit. “Kjo tregon për një mosbashkëpunim ndërmjet prokurorisë, shërbimeve të policisë gjyqësore dhe agjencive të tjera ligjzbatuese”, u shpreh Marku.
“Duhen ndërgjegjësuar qytetarët se korrupsioni dhe ryshfeti nuk janë rruga e duhur që duhet zgjedhur për të zgjidhur problemet e tyre”, përfundoi kryeprokurorja e përkohshme e cila së fudmi, po merr pjesë në analizat vjetore në prokuroritë e rretheve. /tesheshi.com/
