Kreu i Zyrës Serbe për Kosovën në qeverinë e Beogradit, Marko Gjuriç, e ka ashpërsuar gjuhën ndaj ish-luftëtarëve të UÇK-së duke i quajtur ata kriminelë. Shkak është bërë një prononcim i tij lidhur më kërkesën e gjykatës franceze që ka në dorë çështjen e Haradinajt, e cila ka kërkuar informata shtesë në lidhje me akuzat e pretenduara ndaj tij.
Pas kësaj, Gjuriç ka reaguar duke mos u kursyer në epitete. “Besojmë se krimi duhet të ketë emër dhe mbiemër; kriminelët duhet të japin llogari. Është dorëzuar i gjithë dokumentacioni i nevojshëm. Prokuroria dhe organet e gjyqësorit për vite të tëra kanë grumbulluar dokumente. Tribunali i Hagës në mënyrë skandaloze kishte liruar disa kriminelë, por duke u bazuar në punën e organeve gjyqësore serbe ata i posedojnë të gjitha faktet”, ka thënë zyrtari serb.
Krahas mosnjohjes së Kosovës dhe lobimit për t’i bllokuar njohjet e tjera si dhe pranimin në organizmat ndërkombëtare, Serbia është angazhuar fuqishëm në ndryshimin e roleve: viktimizimin e vetes dhe kriminalizimin e tjetrit. Në këtë rast UÇK-së. /tesheshi.com/
