Nga Bardha Nergjoni
Marko Caka është nga ata emra shqiptarë që j ka dalë të hapë dyert e Hollivudit duke marrë pjesë në 60 filma të suksesshëm dhe në mijëra orë xhirim. Edhe pse është ende në role jo protagoniste, shtëpinë e madhe të filmit e ka prekur dhe është rënditur në krah të aktorëve më të njohur në botë. Ndërsa përgatitet për Fast&Furios 8, duket se do të ketë së shpejti një bashkëpunim me Will Smith, i cili në një takim të fundit me të është shprehur pozitiv për t’a ftuar në filmin e radhës. Aktori i famshëm i do shqiptarët dhe ka një miqësi të afërt me Rita Orën. Marko para se të ikte në Amerikë ishte një gazetar dhe kur udhëtoi drejt tokës së premtuar, siç e tregon dhe vetë, të qenit gazetar i ka dhënë një mundësi të artë. Shkodrani nuk e ka harruar vendlindjen. Ai thotë se gjërat më të mira i ka nga ky vend bashkë me të atin. Ndëkohë sa i përket ëndërrave të tij, të luajë një rol prej protagonisti në Hollivud, duket se është ndë më të rëndësishmet. Marko me thjeshtësinë dhe dëshirën që të mos humbë kontaktet me atdheun e tij, vjen në një intervistë për tesheshi.com.
Si mund ta përshkruani historinë e një emigranti që u bë gazetar në Greqi dhe aktor i suksesshëm në Hollivud?
E përshkruaj veten si gjithë ata emigrantë që kur botën e tyre të lirisë e kishin në izolim të plotë dhe kur gjejnë arratinë, marrin me vete një mal me ëndërra. Ëndërra e parë fillonte që me kalimin e kufirit dhe çdo hap tjetër ishte sfidë personale e gjithësecilit. Asgjë nuk vjen pa qenë kërkues ndaj vetëvetes dhe unë këtë bëra duke hedhur hapa të sigurta derisa një ditë, pas studimeve realizova ëndrrën e të qenit gazetar profesionist, sepse amatorizmin mbase e kemi të gjithë në genet tona. Kur erdha në SHBA, doja të isha pranë kinematografisë dhe aktorëve. Fati e solli që duke i intervistuar, të propozohesha për t’u bërë aktor, që më pas mu kthye në pasion.
Si ndjehet familja apo fisi Caka për suksesin tuaj?
Unë di të them që i mblodha të gjithë së bashku rreth meje, pa asnjë dallim. Mbase prej shekujsh vijmë nga një pemë dhe sot ndjehemi krenarë që jemi nga të gjitha trojet. Nuk ka lumturi më të madhe kur më shkruajnë dhe ndjehen krenarë që ky mbiemër me anë të artit kinematografik botëror, lexohet në të gjitha skajet e botës. Për këtë dua të falenderoj industrinë hollivudiane që më dha këtë mundësi.
Do të ktheheni në Shkodër qoftë edhe vetëm për ta parë vendlindjen?
Absolutisht që po. Do të kthehem dhe më vjen keq që këtë qytet të bekuar nga Zoti e braktisa në vitet e mia më të bukura, 25 vjet më parë. Më mungon shumë Shkodra me njerëzit e mrekullueshëm. Bashkë me tim atë, nga liceu pedagogjik i këtij qyteti morëm më të bukurën sa i përket formimit intelektual. Aty mëson se si duhet vlerësuar njeriu, nga më i thjeshti deri tek më intelektuali.
Keni qenë në krah të shumë aktorëve të mëdhenj si Clooney, Julia Robert, Di Caprio, Deniro, Affleck etj, Kë do të veçonit?
Nuk mund të veçoj ndonjë se të gjithë janë të mëdhenj si aktorë dhe si njerëz. Të gjithë kanë diçka ndryshe nga njëri-tjetri, por kur flasim për nivelin profesional, nuk kanë asnjë dallim. Janë të paarritshëm. Ndjehem i privilegjuar që Shtetet e Bashkuara më dhanë mundësinë, jo vetëm t’i njoh nga afër, por të bashkëpunoj me ta dhe ndaj emocionet me ta në një sheshxhirim.
Ndjehem krenar që është vlerësuar puna ime sado modeshte duke radhitur emrin tim pranë tyre. Jam i vetëdijshëm se kam një rrugëtim të gjatë për të arritur në nivelin e tyre, por eksperienca e tyre po rrit dita ditës performancën time duke shtuar edhe dashurinë për aktrimin.
Cila eksperiencë ju ka bërë më tepër përshtypje?
Eksperienca është e pallogaritshme, ku brenda dy viteve kam luajtur mbi 60 filma duke ndarë mijëra orë me aktorë e regjizorë të mëdhenj. E gjithë kjo është një shkollë e madhe për mua.
Sa e vështirë është të ecësh në Hollivud?
Besoj se është shumë e vështirë, duke ditur se ëndërrojnë nga e gjithë bota të luajnë në këtë industri të famshme. Nuk e imagjinoni dot sa kaste nga e gjithë bota bëhen. Me mijëra aktorë aplikojnë për një rol në një film hollivudian dhe të bëhesh pjesë e një kasti është një ëndërr.
Keni bërë një status që Smith i do shqiptarët. Ka një arsye të veçantë apo thjesht ka krijuar simpati?
Njohja me shqiptarët e mirë, ka lënë pështypje të mirë tek Ëill Smith. Një rol të veçantë ka luajtur edhe Rita Ora, si një mike e dashur për familjen Smith. Prandaj edhe njohja me të ishte shumë e ngrohtë dhe menjëherë më shtërngoi dorën duke vlerësuar shqiptarët. Më la të kuptoj se shumë shpejt mund të jem pjesë e filmit të tij dhe ai ma uroi këtë.
Na flisni për filmin më të fundit. Ju pëlqen aksioni apo nuk ka rëndësi tema e filmit?
Filmi më i fundit që do të jem pjesë është Fast&Furios 8. Edhe pse jam në rol jo protagonist si pjesë e ushtrisë amerikane. I pëlqej filmat aksion dhe kam fituar një eksperiencë pranë Keane Rives në John Wick 2.
Cila është ëndrra apo objektivi që keni më shumë për zemër?
Ëndrra ime e vetme është të kap role protagonistësh dhe shpresoj që një projekt i ri do të jetë më afër karakterit tim.
A ka shumë shqiptarë në ambjentet e filmit hollivudian?
Po, mbase ka edhe aktorë të tjerë. Industria e filmit është shumë e madhe. Por përveç James Belushit nuk kam luajtur me asnjë shqiptar tjetër.
Çfarë do t’u thonit shqiptarëve që ju ndjekin dhe ndjehen krenarë për suksesin tuaj?
Shqiptarëve dua t’u them se me shumë punë dhe me mësime aktrimi e ushtrim të vazhdueshëm do të bëhen aktorë të mëdhenj. Të duan akrimin pa menduar në fillim se do ta bëjnë për para. Një ditë industria do tjua shpërblejë. Nga unë nuk do të mungojë kurrë suporti. /tesheshi.com/
