Ukraina ka refuzuar një ultimatum rus që u ofron njerëzve në qytetin e rrethuar të Mariupolit një kalim të sigurt nga porti nëse dorëzohen. Sipas propozimit të Rusisë, civilët do të lejohen të largohen nëse ushtarët ukrainas dorëzojnë armët.
Por Ukraina refuzoi, duke thënë se nuk flitej për dorëzimin e qytetit port strategjik, raporton BBC.
Rreth 300,000 njerëz besohet se janë bllokuar atje, furnizimet me ushqime dhe ilaçe po pakësohen dhe hyrja e ndihmave është bllokuar. Banorët janë nën bombardimet e forta ruse prej javësh, pa energji elektrike dhe ujë.
Detajet e propozimit rus u prezantuan të dielën nga gjenerali Mikhail Mizintsev, i cili tha se Ukraina ka kohë deri në orën 05:00 të Moskës të hënën në mëngjes për të pranuar kushtet e saj.
Forcat ruse thanë se më pas do të lejojnë autokolonat humanitare të ushqimit, ilaçeve dhe furnizimeve të tjera të hyjnë në qytet të sigurt pasi të përfundojë çminimi i rrugës.
Gjenerali rus Mizintsev pranoi se një katastrofë e tmerrshme humanitare po ndodhte atje – dhe tha se oferta do të lejonte civilët të iknin të sigurt në lindje ose perëndim.
Në përgjigje të ofertës, zëvendëskryeministrja e Ukrainës Irina Vereshchuk tha se Ukraina nuk do të ndalojë së mbrojturi Mariupolin.
“Nuk flitet për ndonjë dorëzim apo dorëzim të armëve”, tha Vereshchuk. /tesheshi.com/
