Udhëheqësja e Frontit Nacional në Francë i ka deklaruar agjencisë ruse të lajmeve RIA Novosti se, nëse fiton në zgjedhjet presidenciale, ka për ta njohur Krimenë si pjesë të Rusisë.
“Duke patur parasysh realitetet historike…, unë kam për ta njohur Krimenë si pjesë të territorit rus nëse zgjidhem,” është deklarata e Le Pen-it.
Një referendum i marsit të dy viteve më parë solli ndarjen e Krimesë nga Ukraina dhe bashkimin me Rusinë. Një lëvizje e kundërshtuar nga vendet perëndimore, që e kanë quajtur atë një aneksim ilegal.
E njohur për qëndrimin e saj pro rus, Marine Le Pen i ka quajtur shumë të rëndësishme marrëdhëniet midis vendit të saj dhe Rusisë.
Një polemizuese e spikatur, ajo i ka kritikuar dhe sanksionet europiane.
“Sanksionet europiane nuk janë vetëm kundër interesave të Francës, por janë gjithashtu cenim i traditës shumëshekullore të vendit tonë, që kurrë nuk e ndoqi vullnetin e të tjerëve.”
Marine Le Pen e ka bërë të ditur më herët gjatë këtij viti se do të kandidojë në zgjedhjet e ardhshme presidenciale në Francë. /tesheshi.com/
