Në një takim në qytetin e Marsejës, udhëheqësja e Frontit Nacional, partisë franceze të së djathtës ekstreme, nuk ka përtuar ta akuzojë Gjermaninë për hapje të kufijve për refugjatët për t’i shfrytëzuar ata për krahë pune të lirë.
Marine Le Pen, e njohur për gjuhën e ashpër, ka qenë e drejtpërdrejtë në akuzën e saj, “Gjermania mbase mendon se popullsia e saj është në agoni, e ndoshta po kërkon t’i ulë pagat dhe të vazhdojë të rekrutojë skllevër nëpërmjet emigrimit masiv.”
Le Pen e akuzoi në të njëjtën kohë Gjermaninë se po përpiqet t’i imponojë BE-së politikën e saj të emigracionit.
Sipas RT News-it, ajo ka deklaruar se politika e Gjermanisë do të ketë ndikim mbi tërë BE-në. “Gjermania nuk kërkon vetëm të drejtojë ekonominë tonë, ajo dëshiron të na detyrojë të pranojmë qindra e mijëra azilkërkues.”
Kritikës së Le Pen-it nuk i kanë shpëtuar as politikanët europianë, për “shfrytëzimin e vuajtjeve të këtyre njerëzve të varfër që kapërcejnë detin Mesdhe. Ata po shfrytëzojnë vdekjen e të pafatëve në këto udhëtime të organizuara nga mafia, ata tregojnë fotografi, ata e paraqesin pa asnjë dinjitet vdekjen e një fëmije, vetëm për t’i fajësuar ndërgjegjet europiane dhe për t’i bërë ta pranojnë situatën aktuale.”
Marine Le Pen është e njohur për konfliktin e saj me të atin, Jean-Marie Le Pen, themeluesin e Frontit Nacional, nga i cili e mori udhëheqjen e partisë në vitin 2011. Pas një pezullimi nga forumet partiake, për 87-vjeçarin erdhi në gusht dhe përjashtimi nga partia. /tesheshi.com/
